தொழில் அதிபரிடம் ரூ.10 லட்சம் கொள்ளை: திருடர்களை பிடிக்க தனிப்படை போலீசார் திருச்சி விரைவு

கடத்தூர்,

கோபி அருகே உள்ள பங்களாப்புதூரை சேர்ந்தவர் சிவக்குமார் (வயது 33). தொழில் அதிபர். நேற்று முன்தினம் இவர் கோபியில் உள்ள ஒரு வங்கியில் ரூ.10 லட்சத்தை எடுத்து அதை பையில் வைத்துக்கொண்டு தனது காருக்கு வந்தார். பின்னர் அந்த பணப்பையை காரின் உள்ளே வைத்தார். இதனை மோட்டார்சைக்கிளுடன் நின்று கொண்டிருந்த 2 பேர் நோட்டமிட்டனர். அதில் ஒருவர் சிவக்குமார் அருகில் வந்து காரின் டயர் பஞ்சராகி உள்ளது என்றார். உடனே அவர் காரை பார்த்தார். அப்போது காரின் டயர் ஏதோ ஒரு ஆயுதத்தால் கிழிக்கப்பட்டிருந்தது கண்டு அதிர்ச்சி அடைந்தார்.

இதற்கிடையே அந்த மர்ம நபர், காரின் உள்ளே இருந்த பணப்பையை எடுத்தார். இதை கவனித்த சிவக்குமார், ‘திருடன், திருடன்’ என்று சத்தம் போட்டு கத்தினார். உடனே அந்த நபர் ஓடிச்சென்று அங்கு ஏற்கனவே தயாராக இருந்த மோட்டார்சைக்கிளில் ஏறினார். இதையடுத்து 2 பேரும் மோட்டார்சைக்கிளில் மின்னல் வேகத்தில் அங்கிருந்து சென்றுவிட்டனர்.

இதுகுறித்த புகாரின் பேரில் கோபி போலீசார் வழக்குப்பதிவு செய்து விசாரணை நடத்தி வருகிறார்கள். பணத்தை கொள்ளையடித்த திருடர்களை பிடிக்க போலீஸ் தனிப்படை அமைக்கப்பட்டு உள்ளது. இந்த தனிப்படை போலீசார் அந்த பகுதியில் உள்ள கண்காணிப்பு கேமராவில் பதிவான காட்சி பதிவுகளை ஆய்வு செய்து வருகிறார்கள். மேலும் காரின் டயரை கிழித்து பணத்தை திருடும் சம்பவம் திருச்சி பகுதியில்தான் அடிக்கடி நடந்து வருகிறது.

எனவே கொள்ளையர்கள் திருச்சியை சேர்ந்தவர்களாக இருக்கும் என்ற கோணத்தில் தனிப்படை போலீசார் தங்களுடைய விசாரணையை முடுக்கி விட்டு உள்ளனர். இதற்காக தனிப்படை போலீசார் திருச்சி விரைந்து உள்ளனர்.