‘நாங்கள் துண்டுபோட்டால் நீங்கள் குண்டு போடுகிறீர்கள்’ அனந்தராமன் கிண்டல்

புதுச்சேரி,

புதுவை சட்டசபையில் பூஜ்ய நேரத்தில் பா.ஜ.க எம்.எல்.ஏ. சாமிநாதன் எழுப்பிய பிரச்சினையை தொடர்ந்து நடந்த விவாதம் வருமாறு:-

சாமிநாதன்:- புதுவை கோரிமேடு பகுதியை தாண்டியதும் சுங்கச்சாவடி உள்ளது. இதனால் புதுவை பிராந்திய பகுதியான சேதராப்பட்டுக்கு செல்ல வேண்டும் என்றால் கூட சுங்கக்கட்டணம் செலுத்த வேண்டி உள்ளது. எனவே சுங்கச்சாவடியை ஆரோவில் தாண்டி அமைக்க நடவடிக்கை எடுக்கவேண்டும்.

அமைச்சர் நமச்சிவாயம்:- மத்திய அரசின் மொத்த ஏஜெண்டு. பிரதமரின் நேரடி வாரிசு. இதற்கு நீங்களே நடவடிக்கை எடுக்கலாமே.

சாமிநாதன்:- மாநில அரசு சார்பில் ஐகோர்ட்டில் வழக்கு தொடர்ந்தால் உடனே மாற்றிவிடுவார்கள்.

அமைச்சர் நமச்சிவாயம்:- நீங்கள் ஒரு போன் போட்டாலே மாற்றிவிடுவார்கள். அது மாநில சாலை அல்ல.

சிவா:- எங்களுக்கும் இதனால் பெரிய பாதிப்பு உள்ளது. எதனை யார் சொன்னாலும் அதிலுள்ள உண்மையை பார்க்கவேண்டும்.

தீப்பாய்ந்தான் (காங்):- மாநில எல்லையில் சுங்கச்சாவடி வந்தால் அதை 10 கி.மீ. தூரத்துக்கு அப்பால்தான் வைக்கவேண்டும். இதனால் சேதராப்பட்டு செல்லும் புதுச்சேரி மக்கள் பாதிக்கப்படுகின்றனர். நான்கூட மக்களை திரட்டி இதற்காக போராட்டம் நடத்தி உள்ளேன்.

அமைச்சர் நமச்சிவாயம்:- இதுதொடர்பாக முதல்-அமைச்சர் மத்திய அரசுக்கு கடிதம் எழுதுவார்.

சாமிநாதன்:- இதுவரை எத்தனை கடிதம் எழுதியுள்ளர்கள். மத்திய மந்திரிகளை அடிக்கடி சந்தித்து துண்டுபோட்டுவிட்டு வருகிறீர்கள்.

அரசு கொறடா அனந்தராமன்:- நாங்கள் துண்டுதான் போடுகிறோம். ஆனால் நீங்கள் எங்களுக்கு குண்டு போடுகிறீர்கள்.

அனந்தராமனின் இந்த பதிலை கேட்டு அவையில் சிரிப்பலை எழுந்தது.