மாநில சிறந்த படைப்பாளி குழந்தை விருதுக்கான போட்டிகள் - அதிகாரி தகவல்

புதுச்சேரி,

படைப்பாற்றலில் சிறந்து விளங்கும் குழந்தைகளுக்கு புதுச்சேரி அரசின் ஜவகர் சிறுவர் இல்லம் மாநில சிறந்த படைப்பாளி குழந்தை விருதினை ஆண்டுதோறும் பல்வேறு போட்டி நடத்தி தேர்வு செய்து பரிசு அளித்து வருகிறது. புதுச்சேரி மாநிலத்தில் உள்ள அரசு மற்றும் தனியார் பள்ளிகளில் படிக்கும் 9 வயது முதல் 16 வயது வரை உள்ள குழந்தைகள் படைப்பாற்றல் கலை, நிகழ்கலை, எழுத்து மற்றும் அறிவியல் ஆகிய ஏதேனும் ஒரு பிரிவில் பங்கேற்கலாம்.

இவ்விருதுக்கான சிறந்த குழந்தைகளை தேர்வு செய்ய கொம்யூன் அளவிலான போட்டிகள் அடுத்த மாதம் (அக்டோபர்) 22-ந்தேதி காலை 9 மணிமுதல் நடைபெறும். பாகூர், அரியாங்குப்பம் கொம்யூனை சேர்ந்தவர்களுக்கு அரியாங்குப்பம் அரசு உயர்நிலைப்பள்ளியிலும், வில்லியனூர், நெட்டப்பாக்கம், மண்ணாடிப்பட்டு கொம்யூனை சேர்ந்தவர்களுக்கு வில்லியனூர் அரசு பெண்கள் நடுநிலைப்பள்ளியிலும், உழவர்கரை நகராட்சியை சேர்ந்தவர்களுக்கு தட்டாஞ்சாவடி சேக்கிழார் அரசு உயர்நிலைப்பள்ளியிலும், புதுவை நகராட்சியை சேர்ந்தவர் களுக்கு சவரிராயலு நாயக்கர் அரசு பெண்கள் உயர்நிலைப்பள்ளியிலும் போட்டிகள் நடைபெறும்.

இந்த மையங்களில் தேர்வாகும் குழந்தைகளுக்கு மாநில அளவிலான போட்டிகள் புதுவை ஜவகர் சிறுவர் இல்லத்தில் அடுத்த மாதம் 30 மற்றும் 31-ந்தேதிகளில் நடைபெறும். போட்டிக்கான விதிமுறைகள் மற்றும் நுழைவு படிவம் அந்தந்த பள்ளிகளில் கிடைக்கும்.

பூர்த்தி செய்த விண்ணப்பங்கள் பள்ளி தலைமை நிர்வாகியின் கையொப்பத்துடன் ஜவகர் பால் பவனில் அடுத்த மாதம் 14-ந்தேதி மாலை 5 மணிக்குள் அளிக்கவேண்டும்.

இவ்வாறு அந்த செய்திக் குறிப்பில் இயக்குனர் ருத்ரகவுடு தெரிவித்துள்ளார்.