கழுத்தை நெரித்து மூதாட்டி கொலை; வாலிபர் கைது

பெரம்பூர்,

சென்னை கொடுங்கையூர் முத்தமிழ் நகர் 4-வது பிளாக்கை சேர்ந்தவர் விமலா (வயது 68). இவருக்கு 2 மகன், 2 மகள்கள். அனைவரும் திருமணமாகி தனித்தனியாக வசித்து வருகின்றனர். வீட்டில் தனியாக வசித்து வந்த மூதாட்டி விமலா, கடந்த 4-ந்தேதி மர்மமான முறையில் இறந்து கிடந்தார்.


இதுபற்றி போலீசார் நடத்திய விசாரணையில், அதே பகுதியை சேர்ந்த சுதாகர் (34) என்பவர்தான் மூதாட்டியை கொலை செய்தது தெரிந்தது. அவரை பிடித்து போலீசார் விசாரித்தனர்.

சம்பவத்தன்று குடிபோதையில் இருந்த சுதாகர், வீட்டில் தனியாக இருந்த மூதாட்டி விமலாவை பாலியல் பலாத்காரம் செய்ததாகவும், அப்போது கூச்சலிட்டதால் ஆத்திரத்தில் விமலாவின் கழுத்தை நெரித்துக்கொன்றதாகவும் போலீசாரிடம் தெரிவித்தார். சுதாகர் மீது கொலை வழக்கு பதிவு செய்த போலீசார், அவரை கைது செய்து சிறையில் அடைத்தனர்.