திட்டச்சேரி அருகே சாராயம் கடத்திய வாலிபர் கைது ஸ்கூட்டர் பறிமுதல்

நாகப்பட்டினம்,

நாகை மாவட்டத்தில் மதுபாட்டில் மற்றும் சாராயம் கடத்தலை தடுக்கும் வகையில் போலீஸ் சூப்பிரண்டு ராஜசேகரன் உத்தரவின்படி போலீசார் பல்வேறு இடங்களில் சோதனை மேற்கொண்டு வருகின்றனர்.

இந்த நிலையில் திட்டச்சேரி ஏணக்குடி அருகே போலீசார் நேற்று ரோந்து பணியில் ஈடுபட்டு கொண்டிருந்தனர். அப்போது அந்த வழியாக வந்த ஸ்கூட்டரை நிறுத்தி சோதனை செய்தனர். அதில் சாராய பாட்டில்கள் இருந்தது. இதையடுத்து போலீசார் ஸ்கூட்டரில் வந்தவரிடம் விசாரணை நடத்தினர். அதில் அவர் திருவாரூர் மாவட்டம் குடவாசல் சின்ன ஆற்றங்கரை தெருவை சேர்ந்த செல்வராஜ் மகன் வினோத் (வயது 23) என்பதும், இவர் காரைக்கால் பகுதியில் இருந்து சாராயம் கடத்தி வந்ததும் தெரிய வந்தது.

கைது

இதுகுறித்து திட்டச்சேரி போலீசார் வழக்குப்பதிவு செய்து வினோத்தை கைது செய்தனர். மேலும் அவரிடம் இருந்த 180 மில்லி அளவு கொண்ட 200 சாராய பாட்டில்களும், ஸ்கூட்டரையும் பறிமுதல் செய்தனர்.