கும்பகோணம் அரசு மருத்துவமனையில், பிரசவத்துக்கு அனுமதிக்கப்பட்ட பெண் சாவு - உறவினர்கள் சாலை மறியல்

கும்பகோணம், 

தஞ்சை மாவட்டம் கும்பகோணம் அருகே உள்ள கோவிந்தபுரம் பகுதியை சேர்ந்தவர் சத்யராஜ். தொழிலாளி. இவருடைய மனைவி உமா (வயது32). இவர்களுக்கு கடந்த 6 ஆண்டுகளுக்கு முன்பு திருமணம் நடைபெற்று ஒரு பெண் குழந்தை உள்ளது. இந்தநிலையில் மீண்டும் கர்ப்பமடைந்த உமாவை பிரசவத்துக்கு அவரது உறவினர்கள் அரசு ஆரம்ப சுகாதார நிலையத்துக்கு கொண்டு சென்றனர். பின்னர் அங்கிருந்து அவரை கும்பகோணம் அரசு மருத்துவமனைக்கு கொண்டு சென்றனர். அங்கு அவருக்கு பெண் குழந்தை பிறந்தது. இதன்பின் உமாவுக்கு அதிகமாக ரத்தப்போக்கு ஏற்பட்டதாக தெரிகிறது. இதனால் அவருக்கு டாக்டர்கள் தீவிர சிகிச்சை அளித்தனர். இருப்பினும் சிகிச்சை பலனின்றி உமா பரிதாபமாக இறந்தார்.

உமா உயிரிழந்ததால் அதிர்ச்சி அடைந்த அவரது உறவினர்கள் மற்றும் கோவிந்தபுரம் பகுதி மக்கள் 100-க்கும் மேற்பட்டோர் விடுதலை சிறுத்தைகள் கட்சி மண்டல செயலாளர் விவேகானந்தன் தலைமையில் கும்பகோணம் அரசு மருத்துவமனையை முற்றுகையிட்டு போராட்டத்தில் ஈடுபட்டனர். பின்னர் உமா இறப்புக்கு டாக்டர்கள் மற்றும் செவிலியர்கள் தான் காரணம் என கூறி அவர்கள் மீது நடவடிக்கை எடுக்க கோரி அரசு மருத்துவமனை முன்பு சாலை மறியலில் ஈடுபட்டனர். இதனால் அப்பகுதியில் பரபரப்பு ஏற்பட்டது.

தகவலறிந்த கும்பகோணம் போலீசார் சம்பவ இடத்துக்கு வந்து மறியலில் ஈடுபட்டவர்களிடம் பேச்சுவார்த்தை நடத்தினர். அப்போது சம்பந்தப்பட்டவர்கள் மீது உரிய நடவடிக்கை எடுக்கப்படும் என்று போலீசார் உறுதி அளித்தனர். இதன் பேரில் மறியலில் ஈடுபட்டவர்கள் கலைந்து சென்றனர்.