மாவட்ட செய்திகள்

‘மக்களுக்காக என்ன செய்தார்கள்?’ ரஜினிகாந்த், கமல்ஹாசனுக்கு அரசியல் தெரியுமா? முதல்-அமைச்சர் கேள்வி + "||" + Rajinikanth, Kamal Haasan Does Politics Know? First-Minister Question

‘மக்களுக்காக என்ன செய்தார்கள்?’ ரஜினிகாந்த், கமல்ஹாசனுக்கு அரசியல் தெரியுமா? முதல்-அமைச்சர் கேள்வி

‘மக்களுக்காக என்ன செய்தார்கள்?’ ரஜினிகாந்த், கமல்ஹாசனுக்கு அரசியல் தெரியுமா? முதல்-அமைச்சர் கேள்வி
ரஜினிகாந்த், கமல்ஹாசன் ஆகியோர் மக்களுக்காக என்ன செய்தார்கள்? என்றும், அவர்களுக்கு அரசியல் தெரியுமா? என்றும் முதல்-அமைச்சர் எடப்பாடி பழனிசாமி கேள்வி எழுப்பினார்.
சேலம்,

முதல்-அமைச்சர் எடப்பாடி பழனிசாமி சேலத்தில் நேற்று நிருபர்களுக்கு பேட்டி அளித்தார். அதன் விவரம் வருமாறு:-

கேள்வி:- சென்னையில் காற்று மாசு அதிகமாக இருப்பதற்கு தமிழக அரசு எடுத்துள்ள நடவடிக்கை என்ன?

பதில்:- ஏற்கனவே வருவாய்த்துறை அமைச்சர் ஊடகத்தின் வாயிலாக இதுகுறித்து தகுந்த விளக்கத்தை கொடுத்திருக்கின்றார். எந்தெந்த வகையில் மாசு ஏற்படுகின்றது என்று அவர் தெரிவித்துள்ளார். புல்புல் புயலினால் ஏற்பட்ட பருவநிலை மாற்றம் காரணமாக இந்த நிகழ்வு ஏற்பட்டுள்ளது. தற்போது நாம் இருக்கக்கூடிய இந்த இடத்தில் மாசு ஏதும் தென்படவில்லையே?.


கேள்வி:- பள்ளிக்குழந்தைகளுக்கு மதிய உணவு வழங்குவது போல், காலை உணவு வழங்குவதற்கான ஏற்பாடுகள் ஏதும் உள்ளதா?

பதில்:- தற்போது வரை அப்படிப்பட்ட திட்டம் ஏதும் அரசிடம் இல்லை. நிதிநிலை திருப்தி அடைந்தவுடன் இதுகுறித்து அரசு பரிசீலிக்கும்.

கால்நடை பூங்கா

கேள்வி:- கால்நடை பூங்கா அடிக்கல் நாட்டு விழாவிற்கு பிரதமர் வருகின்றாரா?

பதில்:- கால்நடை பூங்கா அமைப்பது மிகப்பெரிய திட்டம். அதுதொடர்பாக பல்வேறு பணிகள் இருக்கின்றது. இதற்கு முதற்கட்டமாக ரூ.396 கோடி ஒதுக்குகின்றோம். பின்னர் இந்த திட்டம் படிப்படியாக விரிவுப்படுத்தப்படும். ஏறக்குறைய ரூ.1,000 கோடி அளவில் இந்த திட்டத்தை நிறைவேற்ற அரசு திட்டமிட்டிருக்கின்றது.

இது ஆசியாவிலேயே மிகப்பெரிய கால்நடை பூங்காவாக அமைய இருப்பதால் அங்கு கால்நடை ஆராய்ச்சி நிலையம், கால்நடை மருத்துவக்கல்லூரி அமைக்கப்படும். மேலும் இதில் பல்வேறு வகையான திட்டங்களை நடைமுறைப்படுத்த அரசு திட்டமிட்டுள்ளது. தற்போது முதற்கட்ட பணி நடைபெற்று கொண்டிருக்கிறது. அந்த பணிகள் விரைவாக முடிந்து, கால்நடை பூங்கா ஏற்படுத்தும்போது உங்களுக்கு தகவல் தெரிவிக்கப்படும்.

ஒத்துழைப்பு கொடுக்க வேண்டும்

கேள்வி:- நெடுஞ்சாலைத்துறைக்கு வழங்கிய ரூ.5 ஆயிரம் கோடியை மத்திய அரசு திரும்ப பெற்றதாக மறுபடியும் ஒரு குற்றச்சாட்டு வெளியாகி வருகிறதே?

பதில்:- சேலத்தில் இருந்து சென்னை செல்வதற்கு 4 வழிச்சாலையை 8 வழிச்சாலையாக அமைப்பதற்கு நிலம் எடுத்தோம். நிலம் கொடுக்க கூடாது என்று சொன்னீர்கள். இது எல்லா இடங்களுக்கும் தொற்றுநோய் போல் பரவி தமிழகத்தில் எங்கேயும் நிலம் எடுக்க முடியாத நிலை ஏற்பட்டுவிட்டது. மின்கோபுரம் கொண்டு போவதற்கும், சாலை விரிவுப்படுத்துவதற்கும் நிலம் கொடுக்க மாட்டேன் என்கிறார்கள். இதனால் அரசாங்கம் என்ன செய்யமுடியும்?.

விலைமதிக்க முடியாத உயிரை காப்பாற்ற வேண்டும் என்பதற்காக தான் நாங்கள் சாலைகளை விரிவுபடுத்துகிறோம். குறிப்பிட்ட காலத்திற்குள் நாம் நிலத்தை கையகப்படுத்தி மத்திய அரசுக்கு கொடுத்தால்தான் அந்த திட்டத்தை நிறைவேற்ற முடியும். ஆனால், நிலத்தை கையகப்படுத்தும் போது பலர் கோர்ட்டுக்கு சென்றுவிடுகிறார்கள். சிலர் போராட்டங்கள் நடத்துகிறார்கள். இதற்கு சில அரசியல் கட்சிகள் துணை நிற்கின்றன. இவ்வாறு இருக்க எப்படி நாங்கள் விரிவாக்கம் செய்ய முடியும்?. பத்திரிகையாளர்களும், ஊடக நண்பர்களும் அரசுக்கு பக்கபலமாக இருந்தால்தான் அனைத்துத் திட்டங்களையும் நிறைவேற்ற முடியும். பொதுமக்களும் ஒத்துழைப்பை கொடுத்தால் தான் திட்டங்களை நிறைவேற்ற முடியும்.

தடையில்லா மின்சாரம்

அனைவரும் ஒருமித்த கருத்தோடு செயல்பட்டால் தான் சாலை விரிவாக்க பணியும் நடைபெறும். அதேபோல மின்கோபுரமும் கொண்டுவர முடியும். தடையில்லா மின்சாரம் வேண்டும் என்கிறோம். நாளுக்குநாள் மின்சாரத்தின் தேவை அதிகரிப்பதினால், அதற்கேற்றவாறு மின் உற்பத்தியை அதிகரிக்க வேண்டும். மின் உற்பத்தியை அதிகரிக்க வேண்டுமென்றால், மின்பாதை அமைக்க வேண்டும். அப்போது தான் மக்களுக்கு தடையில்லா மின்சாரம் கொடுக்க இயலும்.

இன்னும் 10 ஆண்டு கழித்து என்ன நடக்கும் என்று திட்டமிட்டு நாங்கள் செயல்படுத்துகிறோம். 8 வழிச்சாலை முழுவதுமாக நிறைவேற்றுவதற்கு சுமார் 5 ஆண்டு காலம் ஆகும். இப்படி எல்லோரும் ஒத்துழைப்பு கொடுக்கவில்லையென்றால், அரசாங்கத்தால் எப்படி திட்டங்களை செயல்படுத்த முடியும்? 2001-2002-ல் தோராயமாக 100 லட்சம் வாகனங்கள் என்று இருந்தது, இப்போது 300 லட்சமாக உயர்ந்திருக்கிறது. இதனால், விபத்துகள் அதிகரிக்கிறது.

சாலை விரிவாக்கம்

இவையெல்லாம் குறைக்க வேண்டுமென்ற காரணத்தினால் தான் நவீன முறையில் உலக தரத்திற்கு ஏற்ற சாலை அமைப்பதற்கு நாங்கள் நடவடிக்கை எடுத்து கொண்டிருக்கிறோம். ஆனால் சில காலகட்டத்தில் இதற்கு தடை வருகிறது. இதனால் நாம் கொண்டு வருகின்ற திட்டங்கள் எல்லாம் பாழாகிறது, வீணாகிறது. இன்றைக்கு தமிழகத்தில் 14 சாலைகளை விரிவாக்கம் செய்ய வேண்டும் என்று நாம் வைத்த கோரிக்கையை மத்திய அரசு ஏற்று, அதற்கு அனுமதி கொடுத்தார்கள்.

முதற்கட்டமாக 4 சாலைகளுக்கு மத்திய அரசு அனுமதி கொடுத்து, அதற்கு நிலம் கையகப்படுத்துவதற்கான நடவடிக்கையை நாங்கள் மேற்கொண்டோம். ஒரு சில இடங்களில் நிலம் எடுத்தோம், பெரும்பாலான இடங்களில் எடுக்க முடியவில்லை. நான் டெல்லிக்கு செல்கின்ற போது நேரடியாக பிரதமரையும், மத்திய தரைவழி போக்குவரத்து மந்திரியையும் சந்தித்து கோரிக் கை வைத்து துரிதமாக நிலம் எடுக்கின்ற பணிகளை மேற்கொண்டு பொதுமக்கள் ஆதரவோடு நிலங்களை கையகப்படுத்தி மத்திய தேசிய நெடுஞ்சாலைத்துறைக்கு ஒப்படைத்து, பின்னர் அவர்கள் அங்கே பணி செய்வதற்கு அரசு துணை நிற்கும்.

வயதாகி விட்டது

கேள்வி:- ரஜினியை போன்றே கமல்ஹாசனும் அ.தி.மு.க., தி.மு.க. பற்றி விமர்சனம் செய்துள்ளாரே?

பதில்:- வெற்றிடம் என்று சொன்னவர் ஏன் விக்கிரவாண்டி, நாங்குநேரி ஆகிய 2 சட்டமன்ற இடைத்தேர்தல்களிலும் போட்டியிடவில்லை. கமல் மிகப்பெரிய தலைவர் தானே? நாடாளுமன்ற தேர்தலில் எவ்வளவு ஓட்டுக்களை பெற்றார்?. இவையெல்லாம் வேண்டும் என்றே திட்டமிட்டு 65, 66 வயது ஆகிவிட்ட காரணத்தினால் திரைப்பட துறையில் தகுந்த வாய்ப்பில்லாத காரணத்தினால் கட்சி ஆரம்பிக்கின்றார்கள்.

ஜனநாயக நாட்டில் யார் வேண்டுமானாலும் கட்சி ஆரம்பிக்கலாம், அதில் தவறில்லை. ஆனால் மற்றவர்களை குறை சொல்லி பேசுவது தவறாக உள்ளது. இத்தனை காலமாக அவர் எங்கிருந்தார். நான் 1974-லிருந்து அ.தி.மு.க.வில் சேர்ந்து பாடுபட்டு உழைத்து இந்த நிலைக்கு வந்திருக்கின்றேன். எடுத்தவுடன் நாங்கள் இந்த நிலைக்கு வரவில்லை. ஏறக்குறைய 45 ஆண்டு காலம் கட்சியில் பணியாற்றி இருக்கின்றோம். மக்களுக்காக பல்வேறு போராட்டங்களில் கலந்து கொண்டு சிறை சென்றிருக்கின்றோம். பல்வேறு பணிகளை மக்களுக்கு செய்து ஆதரவை பெற்று இன்றைக்கு இந்த நிலைக்கு உயர்ந்திருக்கிறோம்.

சிவாஜி கணேசன்

ரஜினிகாந்தும், கமல்ஹாசனும் மக்களுக்காக என்ன செய்தார்கள்? திரைப்படங்களில் நடித்தார்கள், வருமானத்தை ஈட்டி கொண்டார்கள். இன்று வரை திரைப்படங்களில் நடித்து கொண்டுதான் இருக்கின்றார்கள். இன்று வரை வருமானத்தை உருவாக்கி கொண்டு தான் இருக்கின்றார்கள். அப்படிப்பட்டவர்கள் மக்களிடத்தில் மிகப்பெரிய செல்வாக்கு இருப்பது போல் காட்டிக் கொள்கிறார்கள்.

இவர்களைவிட மிகப்பெரிய நடிகர் சிவாஜி கணேசனே தேர்தலை சந்தித்து அவருக்கு எப்படிப்பட்ட நிலை ஏற்பட்டதென்று உங்களுக்கே நன்றாக தெரியும். அவரை விட மிகச்சிறந்த நடிகர் இல்லை. எம்.ஜி.ஆருக்கு அடுத்த நிலையில் நடிகர் திலகம் இருந்தார். அவரெல்லாம் கட்சி தொடங்கி ஏற்பட்ட நிலைமை தான் இவருக்கும் ஏற்படும். வயது முதிர்ந்த காரணத்தினாலே கமல்ஹாசன் அவராகவே இப்படி ஒரு முன்னேற்பாட்டை செய்து கொண்டார்.

அரசியல் தெரியுமா?

அவருடைய கட்சியை சேர்ந்தவர்கள் தனது திரைப்படத்தை பார்த்தால் போதுமென்ற நிலைக்கு வந்துவிட்டார்கள் என்று கருதுகின்றேன். அந்த நிலைக்கு சென்று விட்டார், அதனால் தான் கட்சி ஆரம்பித்துள்ளார். அவருக்கு அரசியலில் என்ன தெரியும்? எத்தனை உள்ளாட்சி, பேரூராட்சி, நகராட்சி, மாநகராட்சி உள்ளது என்று தெரியுமா?, அந்த பகுதி மக்களின் பிரச்சினை தெரியுமா? என்ன அடிப்படை தெரியும்? அடிப்படை தெரியாமலே தலைவர் போன்று உருவாக்கி கொண்டார்கள். திரைப்படங்களில் நடித்தார்கள், மக்களின் பணத்தையும் பெற்றுக் கொண்டார்கள், அந்த பணத்தின் வாயிலாக இன்றைக்கு அரசியலில் பிரவேசிக்கின்றார்கள்.

கேள்வி:- ரஜினிகாந்த் கட்சி ஆரம்பித்தாலும் இதுபோல் தான் வருவாரா?

பதில்:- யூகத்தின் அடிப்படையில் கேட்கப்படும் கேள்விகளுக்கு பதில் சொல்ல முடியாது. முதலில் அவர் கட்சி ஆரம்பிக்கட்டும், பின்னர் அதற்குண்டான பதில் தரப்படும்.

இவ்வாறு முதல்-அமைச்சர் எடப்பாடி பழனிசாமி கூறினார்.

தொடர்புடைய செய்திகள்

1. அரசு பள்ளிகளில் படிக்கும் ஏழை மாணவர்கள் விருப்ப பாடமாக இந்தி படிப்பது தவறா? அமைச்சர் கேள்வி
‘அரசு பள்ளிகளில் படிக்கும் ஏழை, எளிய மாணவர்கள் விருப்ப பாடமாக இந்தியை தேர்வு செய்து படிப்பதில் என்ன தவறு இருக்கிறது?’ என்று அமைச்சர் பாண்டியராஜன் கேள்வி எழுப்பினார்.
2. “உங்கள் குழந்தைகள் எங்கு படித்தார்கள்?” - சந்திரபாபு நாயுடுவிற்கு ஜெகன் மோகன் ரெட்டி கேள்வி
ஆந்திர பள்ளிகளில் ஆங்கில வழி கல்வியை அறிமுகப்படுத்துவதற்கு எதிர்கட்சிகள் எதிர்ப்பு தெரிவித்த நிலையில் ஆந்திர முதல்வர் ஜெகன் மோகன் ரெட்டி எதிர்கட்சியினருக்கு கண்டனம் தெரிவித்துள்ளார்.
3. நாடாளுமன்ற தேர்தலைப்போல் உள்ளாட்சி தேர்தலிலும் கூட்டணி தொடரும் முதல்-அமைச்சர் பேட்டி
நாடாளுமன்ற தேர்தலைப்போல் உள்ளாட்சி தேர்தலிலும் கூட்டணி தொடரும் என்று முதல்- அமைச்சர் எடப்பாடி பழனிசாமி கூறினார்.
4. இடைத்தேர்தல் வெற்றியின் மூலம் அ.தி.மு.க. மக்கள் இயக்கம் என நிரூபிக்கப்பட்டு உள்ளது முதல்-அமைச்சர் பேச்சு
இடைத்தேர்தல்களில் கிடைத்த வெற்றியின் மூலம் அ.தி.மு.க. மக்கள் இயக்கம் என்பது நிரூபிக்கப்பட்டுள்ளது என்று முதல்-அமைச்சர் எடப்பாடி பழனிசாமி பேசினார்.
5. சேலத்தில் முதல்-அமைச்சர் எடப்பாடி பழனிசாமியுடன் கே.வி.தங்கபாலு சந்திப்பு
சேலத்தில் முதல்-அமைச்சர் எடப்பாடி பழனிசாமியுடன் காங்கிரஸ் கட்சி முன்னாள் மாநில தலைவர் கே.வி.தங்கபாலு சந்தித்து பேசினார்.