பாலக்கோடு அருகே, சிறுமியை கர்ப்பமாக்கிய 15 வயது சிறுவன் கைது

பென்னாகரம், 

தர்மபுரி மாவட்டம் பாலக்கோடு அருகே உள்ள பஞ்சப்பள்ளி ஆரம்ப சுகாதார நிலையத்திற்கு நேற்று 14 வயது மதிக்கத்தக்க சிறுமியும், 15 வயது மதிக்கத்தக்க சிறுவனும் வந்தனர். இதையொட்டி தனக்கு அடிக்கடி வாந்தி வருவதாக கூறி அங்குள்ள டாக்டர்களிடம் பரிசோதனை செய்வதற்காக சிறுமி சென்றார்.

இதைத் தொடர்ந்து அந்த சிறுமியை டாக்டர்கள் பரிசோதனை செய்தனர். அப்போது சிறுமி கர்ப்பமாக இருப்பது தெரியவந்தது. இதனால் டாக்டர்கள் அதிர்ச்சி அடைந்தனர். இது தொடர்பாக சமூக நலத்துறை அதிகாரிகளுக்கு அவர்கள் தகவல் தெரிவித்தனர். மேலும் பென்னாகரம் அனைத்து மகளிர் போலீஸ் நிலையத்திற்கும் தகவல் தெரிவிக்கப்பட்டது.

அதன்பேரில் சமூக நலத்துறை அதிகாரிகளும், போலீஸ் இன்ஸ்பெக்டர் லதா மற்றும் போலீசாரும் ஆரம்ப சுகாதார நிலையத்திற்கு சென்று அந்த சிறுமியிடமும், சிறுவனிடமும் விசாரணை நடத்தினர். அப்போது அந்த 15 வயது சிறுவனும், 14 வயது சிறுமியும் கடந்த 5 மாதங்களுக்கு முன்பு திருமணம் செய்து கொண்டதும், பின்னர் அவர்கள் கர்நாடக மாநிலம் பெங்களூரு சென்று தனியாக வசித்து வந்ததும், இந்த நிலையில் அந்த சிறுமி கர்ப்பம் அடைந்ததும் தெரியவந்தது.

இதையடுத்து சிறுவனை போலீசார் போக்சோ சட்டத்தில் கைது செய்து சேலம் கூர்நோக்கு இல்லத்தில் ஒப்படைத்தனர். மாணவியை மருத்துவ பரிசோதனைக்காக தர்மபுரி அரசு ஆஸ்பத்திரியில் அனுமதித்தனர். 15 வயது சிறுவன், 14 வயது சிறுமியை திருமணம் செய்து கர்ப்பமாக்கிய சம்பவம் பாலக்கோடு அருகே பெரும் பரபரப்பை ஏற்படுத்தியது.