புதுக்கடை அருகே எல்.ஐ.சி. முகவர் வீட்டில் நகை திருட்டு

புதுக்கடை,

புதுக்கடை அருகே தோட்டவாரம் பகுதியை சேர்ந்தவர் சசிகலா (வயது 45). இவர் எல்.ஐ.சி. முகவராக உள்ளார். இவருக்கு உடல்நிைல சரியில்லாத காரணத்தால் கடந்த 4 மாதங்களாக மேல்புறம் பகுதியில் உள்ள தன்னுடைய தாயார் வீட்டில் இருந்து வருகிறார்.

இந்த நிலையில், சம்பவத்தன்று சசிகலா வீட்டின் கதவு திறந்து கிடப்பதாக அக்கம் பக்கத்தினர் அவருக்கு தகவல் கொடுத்தனர். சசிகலா உடனே வீட்டிற்கு வந்து பார்த்த போது, முன்பக்க கதவின் பூட்டு உடைக்கப்பட்டிருப்பதை கண்டு அதிா்ச்சி அடைந்தார்.

நகை திருட்டு

மேலும் வீட்டில் இருந்த பீரோ உடைக்கப்பட்டு பொருட்கள் சிதறி கிடந்தன. பீரோவில் இருந்த 3½ பவுன் நகையையும் காணவில்லை. மர்ம நபர்கள் வீட்டின் பூட்டை உடைத்து நகையை திருடி சென்றது தெரிய வந்தது.

இதுகுறித்து சசிகலா புதுக்கடை போலீசில் புகார் அளித்தார். அதன் பேரில் போலீசார் சம்பவ இடத்திற்கு விரைந்து வந்து விசாரணை நடத்தினர். மேலும் கைரேகை நிபுணர்கள் வரவழைக்கப்பட்டு கைரேகைகளை பதிவு செய்தனர். இதுதொடர்பாக போலீசார் வழக்குப்பதிவு செய்து மர்ம நபர்களை வலைவீசி தேடி வருகின்றனர்.