நாகை அன்னை சத்யா காப்பகத்தில் பொங்கல் விழா கலெக்டர் பிரவீன்நாயர் பங்கேற்பு

நாகப்பட்டினம்,

நாகையில் உள்ள அன்னை சத்யா அரசினர் குழந்தைகள் காப்பகத்தில் பொங்கல் விழா நடைபெற்றது. விழாவில் மாவட்ட கலெக்டர் பிரவீன்நாயர் தலைமை தாங்கி, காப்பகத்தில் உள்ள குழந்தைகளுக்கு பொங்கல் மற்றும் இனிப்பு, கரும்பு துண்டுகள் வழங்கி கொண்டாடினார். மாவட்ட வருவாய் அலுவலர் இந்துமதி முன்னிலை வகித்தார்.

விழாவில் கலெக்டர் பிரவீன்நாயர் பேசுகையில், நாகை மாவட்டத்தில் 2004-ம் ஆண்டு ஏற்பட்ட சுனாமியின் போது தாய், தந்தையர்களை இழந்த குழந்தைகள் அன்னை சத்யா அரசு காப்பகத்தில் தங்கவைக்கப்பட்டு, இந்த காப்பகத்தில் உள்ள குழந்தைகளுக்கு தேவையான உணவு, உடை, கல்வி உள்ளிட்ட அனைத்து அடிப்படை வசதிகளையும், அவர்களுக்கு தேவையான அனைத்து உதவிகளையும் மாவட்ட நிர்வாகத்தின் சார்பாக வழங்கப்பட்டு வருகிறது. காப்பகத்தில் தங்கி பயிலும் மாணவ-மாணவிகளும் தன்னம்பிக்கையோடும், வைராக்கியத்துடனும் நன்றாக படித்து வாழ்க்கையில் முன்னேற இந்த பொங்கல் நன்னாளில் மனதார வாழ்த்துகிறேன் என்றார்.

உறுதுணையாக இருக்கும்

தொடர்ந்து அருகில் உள்ள அன்னை சத்யா முதியோர் இல்லத்தில் தங்கியிருக்கும் ஆதரவற்ற முதியோர்களை சந்தித்து, அவர்களுடன் கலந்துரையாடி, அவர்களுக்கு தேவையான அனைத்து வசதிகளும் கிடைத்திடும் வகையில் மாவட்ட நிர்வாகம் எப்போதும் உறுதுணையாக இருக்கும் என அவர்களிடையே தெரிவித்தார்.

விழாவில் மாவட்ட சமூகநல அலுவலர் உமையாள் மற்றும் காப்பக பணியாளர்கள், குழந்தைகள் உள்பட பலர் கலந்து கொண்டனர்.