ஹைட்ரோ கார்பன் திட்டத்திற்கு எதிராக கைகாட்டியில் 13-ந் தேதி தொடர் முழக்க போராட்டம்

புதுக்கோட்டை, 

புதுக்கோட்டையில் உள்ள தமிழ்நாடு அறிவியல் மைய அரங்கில் காவிரி படுகை பாதுகாப்பு கூட்டு இயக்க கூட்டம் நடைபெற்றது. கூட்டத்திற்கு தமிழ்நாடு விவசாயிகள் சங்க மாவட்ட செயலாளர் பொன்னுச்சாமி தலைமை தாங்கினார். கூட்டத்தில் புதுக்கோட்டை மாவட்டம் நெடுவாசல் உள்ளிட்ட டெல்டா மாவட்டங்களில் ஹைட்ரோ கார்பன் திட்டத்தை செயல்படுத்த முயலும் மத்திய அரசை கண்டித்தும், விளை நிலத்தையும் விவசாயத்தையும் பாதிக்கும் ஹைட்ரோ கார்பன் திட்டத்தை மத்திய அரசு உடனடியாக கைவிட வேண்டும். ஹைட்ரோ கார்பன் திட்டத்திற்கு எதிராக தமிழக சட்டமன்றத்தில் தீர்மானம் நிறைவேற்ற வேண்டும்.

ஹைட்ரோ கார்பன் திட்டத்தை செயல்படுத்த, மத்திய சுற்றுசூழல் துறையின் அனுமதி தேவையில்லை, சம்பந்தப்பட்ட பகுதி மக்களிடம் கருத்து கேட்டு கூட்டங்கள் நடத்த வேண்டியதில்லை என்ற அறிவிப்பிற்கு கண்டனம் தெரிவித்தும், டெல்டா மாவட்டங்களை பாதுகாக்கப்பட்ட வேளாண் மண்டலமாக அறிவிக்க வேண்டும் என்பது உள்ளிட்ட கோரிக்கைகளை வலியுறுத்தி வருகிற 13-ந் தேதி புதுக்கோட்டை மாவட்டம் ஆவணம் கைகாட்டியில், நெடுவாசல் உள்ளிட்ட பகுதி மக்களையும், மாவட்ட விவசாயிகளும் ஒன்று திரட்டி தொடர் முழக்க போராட்டம் நடத்துவது, தொடர்ச்சியாக வருகிற மார்ச் மாதம் ஆயிரக்கணக்கான விவசாயிகளை ஒன்று திரட்டி தலைமை செயலகத்தை நோக்கி ஊர்வலமாக செல்வது உள்பட பல்வேறு தீர்மானங்கள் நிறைவேற்றப்பட்டன. 

கூட்டத்தில் விவசாயிகள் சங்கங்களை சேர்ந்த தனபதி, மிசா.மாரிமுத்து, விடுதலைக்குமரன் உள்பட பலர் கலந்து கொண்டனர். முன்னதாக சோமையா வரவேற்றார். முடிவில் ராமையா நன்றி கூறினார்.