தூத்துக்குடி அரசு ஆஸ்பத்திரியில் கிருமிநாசினி சுரங்கப்பாதை - அமைச்சர் கடம்பூர் ராஜூ திறந்து வைத்தார்

தூத்துக்குடி, 

தூத்துக்குடி அரசு ஆஸ்பத்திரி நுழைவு வாயிலில் வி.வி.டி. சன்ஸ் பிரைவேட் லிமிடெட் நிறுவனம் சார்பில் கிருமி நாசினி சுரங்கப்பாதை அமைக்கப்பட்டு உள்ளது. இதன் திறப்பு நிகழ்ச்சி நேற்று காலை நடந்தது. மாவட்ட கலெக்டர் சந்தீப் நந்தூரி தலைமை தாங்கினார். தெற்கு மாவட்ட அ.தி.மு.க. செயலாளர் எஸ்.பி.சண்முகநாதன் எம்.எல்.ஏ., மாநகராட்சி ஆணையாளர் ஜெயசீலன் ஆகியோர் முன்னிலை வகித்தனர். சிறப்பு அழைப்பாளராக அமைச்சர் கடம்பூர் ராஜூ கலந்து கொண்டு கிருமிநாசினி சுரங்கப்பாதையை திறந்து வைத்தார். தொடர்ந்து தூத்துக்குடி மாநகராட்சி அம்மா உணவகத்தில் மதிய உணவின்போது முட்டை வழங்கும் திட்டத்தை தொடங்கி வைத்தார்.

பின்னர் அமைச்சர் கடம்பூர் ராஜூ நிருபர்களிடம் கூறியதாவது:-

கொரோனா வைரஸ்

கொரோனா வைரஸ் தடுப்பு நடவடிக்கையாக தமிழகத்தில் ஊரடங்கு உத்தரவு கடைபிடிக்கப்பட்டு வருகிறது. இதற்கு மக்கள் ஒத்துழைப்பு அளிக்க வேண்டும். இந்த வைரஸ் பரவுவதை தடுப்பதற்கு மக்கள் தனித்து இருப்பதே ஒரே வழி. ஊரடங்கின்போது மக்கள் வாழ்வாதாரத்தை பாதுகாப்பதற்காக அனைத்து தரப்பினருக்கும் உணவு பொருட்கள் மற்றும் நிவாரணத்தொகை வழங்கப்பட்டு வருகிறது. வெளிமாநிலத்தை சேர்ந்த தொழிலாளர்களுக்கு உணவு வழங்கவும் நடவடிக்கை எடுக்கப்படுகிறது.

வெளிநாட்டில் இருந்து வந்த 2 ஆயிரத்து 300 பேர் வீடுகளில் வைத்து கண்காணிக்கப்பட்டு வருகின்றனர். அனைத்து அரசு மற்றும் தனியார் ஆஸ்பத்திரிகளிலும் தனிமைப்படுத்தப்பட்ட வார்டுகள் தயார் நிலையில் உள்ளன. அத்தியாவசிய பொருட்கள் மக்களுக்கு தட்டுப்பாடு இன்றி கிடைக்க ஏற்பாடு செய்யப்பட்டு உள்ளது. மக்கள் கூடுவதை தவிர்க்க பல்வேறு இடங்களில் காய்கறி சந்தை மற்றும் நடமாடும் காய்கறி கடைகளும் தொடங்கப்பட்டு வருகிறது. அனைத்து சுகாதார பணியாளர்களுக்கும் பாதுகாப்பு உபகரணங்கள் வழங்கப்பட்டு உள்ளன. விவசாய பணிகள் எந்த இடையூறும் இன்றி நடைபெற அரசு ஏற்பாடு செய்து உள்ளது.

பயிர் காப்பீடு

மேலும் பயிர் காப்பீடு திட்டத்தில் பதிவு செய்த விவசாயிகளுக்கு காப்பீட்டு தொகையாக ரூ.3 கோடியே 86 லட்சம் ஒதுக்கீடு செய்யப்பட்டு அவர்களின் வங்கி கணக்கில் வரவு வைக்கப்படுகிறது. இதில் வெங்காயம் பயிரிட்ட 1,500 விவசாயிகளுக்கு ரூ.2 கோடியே 72 லட்சம், மக்காச்சோளம் பயிரிட்ட 1,904 விவசாயிகளுக்கு ரூ.1 கோடியே 14 லட்சம் ஆக மொத்தம் 3 ஆயிரத்து 404 பேருக்கு காப்பீட்டு தொகை வழங்கப்பட்டு உள்ளது.

தூத்துக்குடி மாவட்டத்தில் கொரோனா நிவாரணத்தொகை மற்றும் விலையில்லா ரேஷன் பொருட்கள் 4 லட்சத்து 61 ஆயிரத்து 378 பேருக்கு வழங்கப்பட்டு உள்ளது. இன்னும் 17 ஆயிரத்து 393 பேருக்கு மட்டும் வழங்கப்பட வேண்டி உள்ளது. அதுவும் விரைந்து வழங்கப்படும்.

ஆய்வகம்

மாவட்டத்தில் அனைத்து பகுதிகளிலும் கிருமிநாசினி தெளிக்கப்பட்டு வருகிறது. தூத்துக்குடி மாவட்டத்தில் 19 பேருக்கு கொரோனா பாதிப்பு ஏற்பட்டு உள்ளது. இதில் 7 பேர் டெல்லி சென்று வந்தவர்கள். தூத்துக்குடியில் கொரோனா வைரஸ் பரிசோதனை செய்வதற்கான ஆய்வகம் அமைக்கும் பணி நடந்து வருகிறது. ஒரு சில நாட்களில் இந்த ஆய்வகம் செயல்பட தொடங்கும்.

நடிகர் அஜித்குமார் ரூ.1¼ கோடி நிதியை கொரோனா தடுப்பு பணிக்காக அளித்து உள்ளார். முதல்-அமைச்சர் பேரிடர் காலங்களில் மனித நேயத்துடன் பிறருக்கு உதவ வேண்டும் எனவும், முதல் -அமைச்சர் பொது நிவாரண நிதிக்கு மக்கள் தங்கள் பங்களிப்பை அதிகமாக அளிக்க வேண்டும் என்றும் கோரிக்கை விடுத்து உள்ளார். பொதுமக்கள் அதிகமாக நிதியுதவி வழங்க முன்வர வேண்டும்.

இவ்வாறு அவர் கூறினார்.

நிகழ்ச்சியில் தூத்துக்குடி உதவி கலெக்டர் சிம்ரான்ஜீத்சிங் கலோன், மாவட்ட கூட்டுறவு வங்கி தலைவர் சுதாகர், தூத்துக்குடி அரசு மருத்துவக்கல்லூரி மருத்துவமனை டீன் திருவாசகமணி, தொழில் அதிபர்கள் கபிலன், கோடீசுவரன், மாவட்ட பஞ்சாயத்து துணைத்தலைவர் செல்வக்குமார், மாநகராட்சி செயற்பொறியாளர் பார்த்திபன், உதவி செயற்பொறியாளர் சரவணன், உதவி பொறியாளர்கள் பிரின்ஸ், ராமச்சந்திரன், தூத்துக்குடி தாசில்தார் செல்வக்குமார், அ.தி.மு.க. முன்னாள் மாவட்ட செயலாளர் ஆறுமுகநயினார் உள்பட பலர் கலந்து கொண்டனர்.

கோவில்பட்டியில்...

கோவில்பட்டி வ.உ.சி. அரசு மேல்நிலைப்பள்ளி வளாகத்தில் செயல்படும் தற்காலிக மார்க்கெட் நுழைவுவாயிலில் கிருமிநாசினி சுரங்கப்பாதை அமைக்கப்பட்டு உள்ளது. இதனை செய்தி மற்றும் விளம்பரத்துறை அமைச்சர் கடம்பூர் ராஜூ தொடங்கி வைத்து, கிருமிநாசினி சுரங்கப்பாதை வழியாக நடந்து சென்றார்.

சின்னப்பன் எம்.எல்.ஏ., கோவில்பட்டி உதவி கலெக்டர் விஜயா, துணை போலீஸ் சூப்பிரண்டு ஜெபராஜ், தாசில்தார் மணிகண்டன், நகரசபை ஆணையாளர் ராஜாராம், யூனியன் ஆணையாளர் மாணிக்கவாசகம், மாவட்ட அறங்காவலர் குழு தலைவர் மோகன், உறுப்பினர் ராமச்சந்திரன், நகர செயலாளர் விஜய பாண்டியன், ஒன்றிய செயலாளர் அய்யாத்துரை பாண்டியன், பொது கூட்டுறவு பண்டகசாலை தலைவர் வக்கீல் ரத்தினராஜ், பால் உற்பத்தியாளர் கூட்டுறவு சங்க தலைவர் ராமச்சந்திரன் மற்றும் பலர் உடன் இருந்தனர்.

ரூ.4 லட்சம் நிதியுதவி

கொரோனா வைரஸ் பரவாமல் தடுக்கும் பணிகளுக்கு தமிழக அரசுக்கு உதவிடும் வகையில், கோவில்பட்டி நாடார் உறவின்முறை சங்கத்தின் கல்வி நிறுவனங்கள் சார்பில், முதல்-அமைச்சரின் நிவாரண நிதிக்கு ரூ.4 லட்சம் வழங்கப்பட்டது. இதற்கான காசோலையை கோவில்பட்டியில் அமைச்சர் கடம்பூர் ராஜூவிடம் நாடார் உறவின்முறை சங்க தலைவர் பழனிசெல்வம் வழங்கினார். சங்க பொருளாளர் சுரேஷ்குமார், எஸ்.எஸ். துரைச்சாமி நாடார் மாரியம்மாள் கல்லூரி செயலாளர் கண்ணன், பொது மருத்துவமனை தலைவர் திலகரத்தினம், நிர்வாகி ஜோதிபாசு, வேலாயுதபுரம் நாடார் உறவின் முறை சங்க தலைவர் வேல்முருகேசன் மற்றும் பலர் உடன் இருந்தனர்.

கோவில்பட்டி-எட்டயபுரம் ரோடு ஸ்ரீ மருத்துவமனையில் கொரோனா நோயாளிகளுக்கு சிகிச்சை அளிப்பதற்காக 9 படுக்கைகள், 2 வெண்டிலேட்டர்களுடன் (செயற்கை சுவாசக்கருவி) கூடிய தனிமைப்படுத்தப்பட்ட வார்டு அமைக்கப்பட்டு உள்ளது. இதனை அமைச்சர் கடம்பூர் ராஜூ பார்வையிட்டு ஆய்வு செய்தார். ஸ்ரீ மருத்துவமனையில் கொரோனா நோயாளிகளுக்கு இலவச சிகிச்சை அளிக்க ஏற்பாடு செய்யப்பட்டு உள்ளதாக மருத்துவமனை நிர்வாக இயக்குனர் டாக்டர் லதா ஸ்ரீவெங்கடேஷ், டாக்டர் ஸ்ரீவெங்கடேஷ் ஆகியோர் தெரிவித்தனர்.