பவானி பஸ் நிலையத்தில் உள்ள காய்கறி சந்தையில் கிருமி நாசினி சுரங்கப்பாதை - அமைச்சர் கே.சி.கருப்பணன் திறந்து வைத்தார்

பவானி, 

பவானி தினசரி காய்கறி சந்தை தற்போது புதிய பஸ் நிலையத்தில் தற்காலிகமாக செயல்பட்டு வருகிறது. பவானி மற்றும் அதன் சுற்றுவட்டார பகுதிகளை சேர்ந்த பொதுமக்கள் இங்கு வந்து காய்கறிகளை வாங்கி சென்று வருகிறார்கள். இந்த நிலையில் கொரோனா தொற்று பரவாமல் தடுக்க காய்கறி சந்தையில் கிருமி நாசினி சுரங்கப்பாதை பவானி நகர ஜல்லிக்கட்டு பேரவை சார்பில் அமைக்கப்பட்டு உள்ளது. இதன் திறப்பு நிகழ்ச்சி நடைபெற்றது.

நிகழ்ச்சியில் தமிழக சுற்றுச்சூழல் துறை அமைச்சர் கே.சி.கருப்பணன் கலந்து கொண்டு கிருமி நாசினி சுரங்கப்பாதையை திறந்து வைத்தார். இதில் நகராட்சி பொறியாளர் கதிர்வேலு, நகர அ.தி.மு.க. செயலாளர் கிருஷ்ணராஜ், மாவட்ட ஜல்லிக்கட்டு பேரவையின் தலைவர் சுந்தர் உள்பட பலர் கலந்து கொண்டனர்.

இதைத்தொடர்ந்து அவர் பவானி அரசு ஆஸ்பத்திரியில் திடீர் ஆய்வு மேற்கொண்டார். அப்போது அங்குள்ள தலைமை மருத்துவ அதிகாரி டாக்டர் கோபாலகிருஷ்ணனிடம், ஆஸ்பத்திரியில் சிகிச்சை அளிக்க டாக்டர்கள் இருக்கிறார்களா? போதிய மருந்துகள் உள்ளதா? என கேட்டறிந்தார். அதற்கு டாக்டர் கோபாலகிருஷ்ணன் கூறுகையில், ‘பவானி அரசு ஆஸ்பத்திரியில் 14 டாக்டர்கள் உள்ளனர். தொடர்ந்து 3 சிப்ட் என முறை வைத்து டாக்டர்கள் பணியாற்றி வருகிறார்கள். ஆஸ்பத்திரிக்கு வரும் நோயாளிகள் சமூக இடைவெளியை கடைபிடிக்க வேண்டும் என வலியுறுத்தப்பட்டு உள்ளது,’ என்றார்.