விவசாயிகள் கிடங்குகளில் இருப்பு வைக்கப்பட்டுள்ள விளைபொருட்களின் மீது 5 சதவீத வட்டியில் ரூ.3 லட்சம் கடன்

திருப்பத்தூர்,

திருப்பத்தூர் மாவட்ட கலெக்டர் அலுவலகத்தில் கலெக்டர் சிவன்அருள் தலைமையில் கூட்டம் நடந்தது. கூட்டத்தில் கொரோனா தடுப்பு நடவடிக்கைகள் குறித்து கலெக்டர் சிவன்அருள் பேசினார்.

அவர் பேசியதாவது:-

திருப்பத்தூர் மாவட்டத்தில் கொரோனா தொற்றை தடுக்க பல்வேறு நடவடிக்கைகள் எடுக்கப்பட்டு வருகிறது. வேளாண் விளை பொருட்களை விற்பனைக்கு எடுத்துச் செல்வதில் உள்ள பிரச்சினைகளை களைந்திட ஒழுங்குமுறை விற்பனை கூடங்களில் பயன்பாட்டுக்காக நவீன சேமிப்பு கிடங்கு அமைக்கப்பட்டுள்ளன. அவை தற்போது பயன்பாட்டில் இருந்து வருகிறது. விவசாயிகள் விளை பொருட்களை இக்கிடங்குகளில் 180 நாட்கள் வரை பயன்படுத்தி பாதுகாக்கலாம்.

அதிக விலை கிடைக்கும் போது விளை பொருட்களை கிடங்குகளில் இருந்து விற்பனை செய்திட கிடங்கு வாடகை கட்டணத்தை முதல் 30 நாட்களுக்கு செலுத்திட தேவையில்லை. அது, மேலும் ஒரு மாதம் நீடிக்கப்பட்டுள்ளது. கிடங்குகளில் இருப்பு வைக்கப்பட்டுள்ள விளை பொருட்கள் அடமானத்தின் பேரில் அதிகபட்சம் 50 சதவீத சந்தை மதிப்பு அல்லது 3 லட்சம் ரூபாய் இவற்றில் எது குறைவோ அதனை கடனாக பெறலாம். கால அளவு 180 நாட்களாகும். இதற்கான வட்டி 5 சதவீதம் ஆகும். கடனுக்கான வட்டி முதல் 30 நாட்களுக்கு செலுத்த தேவையில்லை.

1 சதவீத கட்டணம் ரத்து

பொதுமக்களுக்கு தங்கு தடையின்றி காய்கறிகள் மற்றும் பழங்கள் கிடைக்க அவற்றைப் பாதுகாக்கவும் தடைபடும் காலங்களில் விற்பனை செய்வதற்கு ஏதுவாக விவசாயிகளின் பயன்பாட்டிற்காக குளிர்பதன கிடங்கு இயங்கி வருகின்றன. கிடங்குகளில் காய்கறிகள் மற்றும் பழங்களை சேமித்து வைக்க விவசாயிகளிடம் இருந்து பயன்பாட்டுக் கட்டணம் வசூலிக்கப்பட்டு வருகிறது. தற்போது உள்ள சூழ்நிலையை கருத்தில் கொண்டு மேலும் 15 நாட்களில் மாம்பழம் உற்பத்தி அதிகரிக்கும் என எதிர்பார்க்கப்படுகிறது. விவசாயிகளிடம் வசூலிக்கப்படும் பயன்பாட்டு கட்டணத் தொகை வரும் 30-ந்தேதி வரை வசூலிக்கப்பட மாட்டாது. கட்டணத்தை முழுவதும் தமிழக அரசே ஏற்கும்.

தற்போது நெல், சிறு தானியங்கள், பயிறு வகைகள், நிலக்கடலை, எள், தேங்காய், பருத்தி, வெங்காயம், மிளகாய், முந்திரி, வெல்லம், மரவள்ளி மற்றும் சில மாவட்டங்களில் பழங்கள் மற்றும் காய்கறிகள் உள்ளிட்ட விளைபொருட்களை விவசாயிகள் விற்பனை செய்யும் போது அவர்களிடம் இருந்து விற்பனை மதிப்பில் 1 சதவீதம் வரை கட்டணம் வசூலிக்கப்படுகிறது. தற்போது நிலவி வரும் சூழ்நிலையை கருத்தில் கொண்டு விவசாயிடம் இருந்து கொள்முதல் செய்யப்படும் விளை பொருட்களை நியாயமான விலையில் பொதுமக்களுக்கு வினி யோகம் செய்திட ஏதுவாக தற்போது வியாபாரிகள் செலுத்தும் 1 சதவீத கட்டணத்தை 30-ந் தேதி வரை ரத்து செய்யப்பட்டிருந்தது. மேலும் ஒரு மாத காலம் நீட்டிக்கப்படுகிறது.

இவ்வாறு அவர் கூறினார்.

கூட்டத்தில் மாவட்ட போலீஸ் சூப்பிரண்டு விஜயகுமார், மாவட்ட வருவாய் அலுவலர் தங்கையபாண்டியன், கலெக்டரின் நேர்முக உதவியாளர் வில்சன்ராஜசேகர், வாணியம்பாடி வருவாய் கோட்டாட்சியர் காயத்திரி, ஊராட்சிகள் உதவி இயக்குனர் அருண் உள்பட அனைத்துத்துறை அதிகாரிகள் கலந்து கொண்டனர்.