<
தஞ்சையில் பரபரப்பு சம்பவம்: கொரோனா வார்டில் இருந்து தப்பி வந்ததாக கூறிய நபர் 108 ஆம்புலன்சில் அழைத்துச்சென்று பரிசோதனை
கொரோனா வார்டில் இருந்து தப்பி வந்ததாக கூறிய நபரால் பரபரப்பு ஏற்பட்டது. 108 ஆம்புலன்சில் அழைத்துச்சென்று பரிசோதனை செய்யப்பட்டது.
தஞ்சாவூர்,
கொரோனா வார்டில் இருந்து தப்பி வந்ததாக கூறிய நபரால் பரபரப்பு ஏற்பட்டது. 108 ஆம்புலன்சில் அழைத்துச்சென்று பரிசோதனை செய்யப்பட்டது.
தஞ்சையில் நேற்று பெரும் பரபரப்பை ஏற்படுத்திய இந்த சம்பவம் பற்றிய விவரம் வருமாறு:-
கொரோனா வார்டில் இருந்து தப்பியதாக...
தஞ்சை மானம்புச்சாவடியில் உள்ள ஒரு பள்ளி வளாகத்தில் காய்கறி சந்தை இயங்கி வருகிறது. இந்த சந்தையில் 50 வயது மதிக்கத்தக்க நபர் வெகுநேரமாக அங்கு நின்று கொண்டிருந்தார். அதைப்பார்த்த வியாபாரிகள் அவரிடம் ஏன் நீண்ட நேரமாக இங்கு நிற்கிறாய்? இங்கிருந்து செல் என கூறி உள்ளனர்.
அதற்கு அவர், நான் கொரோனா நோயாளி. தஞ்சையை அடுத்த காசவளநாடுபுதூரை சேர்ந்தவன். நான் திருச்சி அரசு மருத்துவமனையில் உள்ள கொரோனா வார்டில் சிகிச்சை பெற்று வந்தேன். அங்கிருந்து தப்பி ஓடி வந்து விட்டேன் என்று கூறினார். அவர் அவ்வாறு கூறியதை கேட்டதும் அங்கிருந்த வியாபாரிகள், பொதுமக்கள் அதிர்ச்சி அடைந்தனர்.
முரணான தகவல்
பின்னர் அந்த நபர், அங்கிருந்து வேக, வேகமாக நடக்க தொடங்கினார். இது குறித்து கொரோனா தடுப்பு தன்னார்வ படையினருக்கு தகவல் தெரிவிக்கப்பட்டது. தகவல் அறிந்து அவர்கள் அங்கு உடனடியாக வந்து அந்த நபரை விரட்டிச்சென்றனர். இந்த நிலையில் அந்த நபர், தஞ்சை காந்திஜி சாலையில் உள்ள ஒரு கடையின் முன்பு அமர்ந்தார்.
பின்னர் இது குறித்து அதிகாரிகளுக்கு தகவல் தெரிவிக்கப்பட்டது. அதன் பேரில் மாநகர்நல அலுவலர் டாக்டர் நமச்சிவாயம், தாசில்தார் வெங்கடேசன் மற்றும் அதிகாரிகள் அங்கு வந்தனர். அவர்கள், அந்த நபரிடம் விசாரணை நடத்திய போது அவர் மனநலம் பாதிக்கப்பட்டவர் போல முன்னுக்குப்பின் முரணான தகவலை தெரிவித்தார்.
108 ஆம்புலன்ஸ்
இதையடுத்து 108 ஆம்புலன்சுக்கும் தகவல் தெரிவிக்கப்பட்டது. பின்னர் அந்த நபர் ஆம்புலன்சில் ஏற்றப்பட்டு தஞ்சை மருத்துவக்கல்லூரி மருத்துவமனைக்கு கொண்டு செல்லப்பட்டு கொரோனா பரிசோதனைக்கு உட்படுத்தப்பட்டார். மேலும் அந்த நபர் அமர்ந்த பகுதிகளில் கிருமிநாசினியும் தெளிக்கப்பட்டது.
இந்த சம்பவத்தால் தஞ்சையில் நேற்று சிறிது நேரம் பெரும் பரபரப்பு ஏற்பட்டது.
Related Tags :
Next Story
"Daily Thanthi" a prestigious product from The Thanthi Trust
எங்களைப்பற்றி தனித்தன்மை பாதுகாப்பு தொடர்புகொள்ள வலைத்தள தொகுப்பு ஆலோசனைகள் வேலைவாய்ப்பு
Paper Ad Tariff Web Ad Tariff Terms & Conditions (E-paper)
காப்புரிமை 2024, © The Thanthi Trust Powered by Hocalwire
