தஞ்சை-திருவாரூரில், ஒரே நாளில் கொரோனாவுக்கு சிகிச்சை பெற்று வந்த 12 பேர் குணம் அடைந்தனர்

தஞ்சாவூர், 

தஞ்சை, திருவாரூரில் கொரோனாவுக்கு சிகிச்சை பெற்று வந்த மேலும் 12 பேர் குணம் அடைந்து வீடு திரும்பினர்.

55 பேர் பாதிப்பு

தஞசை மாவட்டத்தில் கொரோனா நோய் தொற்றால் 55 பேர் பாதிக்கப்பட்டுள்ளனர். இவர்களில் கும்பகோணம் பகுதியை சேர்ந்த 9 பேரும், திருவையாறு பகுதியை சேர்ந்த 3 பேரும், திருவோணம் பகுதியை சேர்ந்த ஒருவரும் அடங்குவர். மேலும் ஒரத்தநாடு பகுதியை சேர்ந்த 5 பேர், அதிராம்பட்டினம் பகுதியை சேர்ந்த 11 பேர், அம்மாப்பேட்டையை சேர்ந்த 4 பேர், தஞ்சையை சேர்ந்த 3 பேரும் அடங்குவர்.

இவர்களில் கொரோனா நோய்தொற்றால் பாதிக்கப்பட்ட முதல் நபரான கும்பகோணத்தை சேர்ந்த சமையல் தொழிலாளி உள்பட 18 பேர் சிகிச்சை பெற்று குணம் அடைந்து வீடு திரும்பினர். மீதம் உள்ள 37 பேருக்கு தஞ்சை மருத்துவக்கல்லூரி மருத்துவமனையில் சிகிச்சை அளிக்கப்பட்டு வந்தது.

மேலும் 6 பேர் வீடு திரும்பினர்

இந்த நிலையில் அதிராம்பட்டினம் பகுதியை சேர்ந்த 3 பேர், திருவையாறு பகுதியை சேர்ந்த ஒருவர், கும்பகோணம் பகுதியை சேர்ந்த 2 பேர், என 5 ஆண்கள், ஒரு பெண் உள்பட 6 பேர் நேற்று குணம் அடைந்து வீடு திரும்பினர். இதன் மூலம் குணம் அடைந்து வீடு திரும்பியவர்களின் எண்ணிக்கை 24 ஆக உயர்ந்துள்ளது. தற்போது 31 பேர் தொடர்ந்து சிகிச்சை பெற்று வருகிறார்கள்

குணம் அடைந்தவர்களுக்கு தஞ்சை மருத்துவக்கல்லூரி முதல்வர் டாக்டர் குமுதா லிங்கராஜ் மற்றும் டாக்டர்கள் பழங்கள் மற்றும் குணம் அடைந்ததற்கான சான்றிதழ் வழங்கி வழியனுப்பி வைத்தனர். மேலும் குணம் அடைந்து வீடு செல்லும் 6 பேரும் தொடர்ந்து 14 நாட்கள் அவரவர் இல்லத்தில் தங்களை தனிமைப்படுத்திக் கொள்ளுமாறு அறிவுறுத்தப்பட்டனர்.

111 பேர் காத்திருப்பு

காய்ச்சல், சளி, இருமல் ஆகிய அறிகுறிகளுடன் தஞ்சை மருத்துவக்கல்லூரி மருத்துவமனையிலும், ராஜா மிராசுதார் மருத்துவமனையிலும், செங்கிப்பட்டி அரசு பொறியியல் கல்லூரியிலும் தனிமைப்படுத்தப்பட்டு மற்றும் சிகிச்சை பெற்ற 2 ஆயிரத்து 946 பேருக்கு கொரோனா பரிசோதனை செய்யப்பட்டது. இதில் 2,780 நபர்களுக்கு அறிகுறி இல்லை என தெரிய வந்துள்ளது. 111 நபர்களுக்கு பரிசோதனை முடிவுகள் வர வேண்டியுள்ளது.

திருவாரூர்

திருவாரூர் அரசு மருத்துவக்கல்லூரி மருத்துவமனையில் திருவாரூர் மாவட்டத்தை சேர்ந்த 17 பேர், நாகை மாவட்டத்தை சேர்ந்த 21 பேர் என மொத்தம் 38 பேர் கொரோனா தொற்று உறுதி செய்யப்பட்டு சிகிச்சை பெற்று வந்தனர். இதில் நேற்று திருவாரூர் மாவட்டத்தை சேர்ந்த 2 பேர், நாகை மாவட்டத்தை சேர்ந்த 4 பேர் என மொத்தம் 6 பேர் முழுவதுமாக குணம் அடைந்தனர். இதையடுத்து அவர்கள் 6 பேரும் நேற்று ஆம்புலன்ஸ் மூலமாக வீட்டுக்கு அனுப்பி வைக்கப்பட்டனர்.

டாக்டர்கள் உற்சாகம்

முன்னதாக 6 பேரும் திருவாரூர் அரசு மருத்துவக்கல்லூரி மருத்துவமனையின் வெளி நோயாளிகள் பிரிவு முன்பு தனித்தனியாக அமர வைக்கப்பட்டு இருந்தனர். அப்போது அவர்களிடம், 14 நாட்களுக்கு தனிமையில் இருக்கும்படி மருத்துவக்கல்லூரி முதல்வர் முத்துக்குமரன் அறிவுறுத்தினார். இதையடுத்து அவருடைய தலைமையில் டாக்டர்கள், செவிலியர்கள் உற்சாகமாக கைத்தட்டி அவர்களை வழியனுப்பி வைத்தனர். திருவாரூர் அரசு மருத்துவக்கல்லூரி மருத்துவமனையில் தற்போது திருவாரூர் மாவட்டத்தை சேர்ந்த 15 பேர், நாகை மாவட்டத்தை சேர்ந்த 17 பேர் என மொத்தம் 32 பேர் கொரோனாவுக்கு சிகிச்சை பெற்று வருகின்றனர்.