13 நாட்களாக கொரோனா தொற்று இல்லை: பச்சை மண்டலமாக மாற குமரி மாவட்டத்துக்கு வாய்ப்பு

நாகர்கோவில், 

குமரியில் கடந்த 13 நாட்களாக கொரோனா தொற்று யாருக்கும் இல்லை. இதனால் ஊரடங்கு காலம் முடிவதற்குள் பச்சை மண்டலமாக மாற வாய்ப்பு உள்ளது.

7 பேர் குணமடைந்தனர்

குமரி மாவட்டத்தில் கொரோனாவால் 16 பேர் பாதிக்கப்பட்டனர். 15-க்கும் மேற்பட்டவர்கள் பாதிக்கப்பட்டிருந்தால், அந்த மாவட்டம் சிவப்பு மண்டலமாக அறிவிக்கப்பட்டுள்ளது. இதனால் குமரி மாவட்டமும் சிவப்பு மண்டல பட்டியலில் சேர்க்கப்பட்டது. தற்போது பாதிக்கப்பட்டவர்களில் ஒன்றிரண்டு பேராக பூரண குணம் அடைந்து வருகிறார்கள். இதுவரை 7 பேர் கொரோனாவில் இருந்து மீண்டனர். அவர்களில் நாகர்கோவில் வெள்ளாடிச்சிவிளையைச் சேர்ந்தவரும், அவருடைய 4 வயது மகனும் குணமடைந்த பிறகும் ஆஸ்பத்திரியிலேயே இருந்து வருகிறார்கள். அதாவது, அவர்களுடைய குடும்பத்தினர் கொரோனா தொடர் சிகிச்சையில் இருப்பதால், வீட்டுக்கு செல்ல மறுத்து அங்கேயே உள்ளனர்.

6 பேருக்கு மீண்டும் பரிசோதனை

மற்ற 5 பேரும் தேங்காப்பட்டணம், நாகர்கோவில், மணிக் கட்டி பொட்டல் அனந்தசாமிபுரத்தைச் சேர்ந்தவர்கள். அவர்கள் வீடு திரும்பி விட்டனர். இதனால் 9 பேர் தொடர் சிகிச்சையில் இருந்து வருகிறார்கள். அதில், 6 பேருக்கு நேற்று மீண்டும் பரிசோதனை செய்யப்பட்டது. அதற்கான முடிவுகள் இன்று (செவ்வாய்க்கிழமை) தெரிய வரும் என்று கூறப்படுகிறது.

வெளிநாடுகள், வெளி மாநிலங்களில் இருந்து வந்தவர்கள், கொரோனா தொற்றுள்ளவர்களுடன் நெருங்கி பழகியவர்கள் என மொத்தம் 4,466 பேர் அவரவர் வீடுகளில் 28 நாட்கள் தனிமைப்படுத்துதலில் வைக்கப்பட்டு இருந்தனர். அதில் தற்போது 218 பேர் மட்டுமே தனிமைப்படுத்துதலில் உள்ளனர். மற்ற அனைவரும் அதிலிருந்து விடுவிக்கப்பட்டுள்ளனர்.

எண்ணிக்கை குறையும்

குமரி மாவட்டத்தில் கடைசியாக கொரோனாவால் பாதிக்கப்பட்டவர் கண்டறியப்பட்டது கடந்த 14-ந் தேதி ஆகும். அதன் பிறகு 13 நாட்கள் ஆகியும் இதுவரை யாருக் கும் கொரோனா தொற்று ஏற்படவில்லை. அதன்படி புதிதாக யாருக்கும் கொரோனா தொற்று இல்லாததாலும், பாதிக்கப்பட்டவர்களில் 7 பேர் குணமடைந்து விட்டதாலும், ஒன்றிரண்டு நாட்களில் இன்னும் சிலர் குணமடைய இருப்பதாலும் குமரியில் கொரோனாவால் பாதிக்கப்பட்டவர்களின் எண்ணிக்கை வெகுவாக குறைய உள்ளது.

பச்சை மண்டலமாக...

இதனால் ஊரடங்கு காலம் முடிவதற்குள் குமரி மாவட்டம் சிவப்பு மண்டலத்தில் இருந்து பச்சை மண்டலமாக மாற வாய்ப்பு இருப்பதாக கூறப்படுகிறது. மாவட்டத்தில் இதுவரை மொத்தம் 2 ஆயிரம் பேருக்கு பரிசோதனை செய்யப்பட்டுள்ளது. 1,644 பேருக்கு கொரோனா தொற்று இல்லை. இன்னும் 340 பேருக்கு பரிசோதனை முடிவுகள் வரவேண்டி உள்ளது.