விளைபொருட்கள் கிடங்கு கட்டண ரத்து மேலும் ஒரு மாதத்துக்கு நீட்டிப்பு - கலெக்டர் தகவல்

ஈரோடு, 

ஈரோடு மாவட்ட கலெக்டர் சி.கதிரவன் வெளியிட்டு உள்ள செய்திக்குறிப்பில் கூறிஇருப்பதாவது:-

விவசாய விளைபொருட்களை விற்பனைக்கு எடுத்து செல்வதில் உள்ள பிரச்சினைகளை களைந்திடும் வகையில் நவீன சேமிப்பு கிடங்குகள் செயல்பட்டு வருகின்றன. இந்த கிடங்குகளில் 6 மாதங்கள் வரை விளை பொருட்களை வைத்து பாதுகாக்கலாம். அதிக விலை கிடைக்கும்போது கிடங்கில் இருந்து விளைபொருட்களை எடுத்து விவசாயிகள் விற்பனை செய்கிறார்கள். ஊரடங்கு உத்தரவு காரணமாக கிடங்கு வாடகை கட்டணத்தை முதல் 30 நாட்களுக்கு செலுத்த தேவையில்லை என்று அறிவிக்கப்பட்டு இருந்தது. இந்த நிலையில் அது மேலும் ஒரு மாத காலம் நீட்டிக்கப்படும் என்று தமிழ்நாடு முதல்-அமைச்சர் உத்தரவிட்டு உள்ளார்.

அதன்படி கிடங்குகளில் இருப்பு வைக்கப்பட்டுள்ள விளைபொருட்களை அடமானத்தின் பேரில் அதிகபட்சம் 50 சதவீத சந்தை மதிப்பு அல்லது ரூ.3 லட்சம் இதில் எது குறைவோ அந்த அளவுக்கு பொருளட்டுக்கடனை பெற்றிடலாம். கடனுக்கான கால அளவு 180 நாட்கள் ஆகும். இதற்கான வட்டி 5 சதவீதமாகும். கடனுக்கான வட்டி முதல் 30 நாட்களுக்கு செலுத்த தேவையில்லை என்று உத்தரவிடப்பட்ட நிலையில், அது மேலும் ஒரு மாத காலம் நீட்டிக்கப்படுகிறது.

பொதுமக்களுக்கு தங்கு தடையின்றி காய்கறிகள் மற்றும் பழங்கள் கிடைத்திடவும், அவற்றை பாதுகாத்து தேவைப்படும் காலங்களில் விற்பனை செய்வதற்கு ஏதுவாகவும், விவசாயிகளின் பயன்பாட்டிற்காக குளிர்பதன கிடங்குகள் இயங்கி வருகின்றன. இந்த கிடங்குகளில் காய்கறிகள் மற்றும் பழங்களை சேமித்து வைக்க விவசாயிகளிடம் இருந்து பயன்பாட்டு கட்டண தொகை வசூலிக்கப்பட்டு வருகிறது.

தற்போதுள்ள சூழ்நிலையினை கருத்தில் கொண்டும், மேலும் 15 நாட்களில் மாம்பழம் உற்பத்தி அதிகரிக்கும் என எதிர்பார்க்கப்படுவதாலும், 30-ந் தேதி வரை வசூலிக்கப்பட மாட்டாது என்று அறிவிக்கப்பட்டது. இந்த சலுகை மேலும் ஒரு மாத காலத்திற்கு நீட்டிக்கப்படுகிறது.

நெல், சிறு தானியங்கள், பயறு வகைகள், நிலக்கடலை, எள், தேங்காய், பருத்தி, வெங்காயம், மிளகாய், புளி, முந்திரி, வெல்லம், மரவள்ளிக்கிழங்கு மற்றும் சில மாவட்டங்களில் பழங்கள் மற்றும் காய்கறிகள் உள்ளிட்ட விளைபொருட்களை விவசாயிகள் விற்பனை செய்யும்போது, வியாபாரிகளிடம் இருந்து விற்பனை மதிப்பில் 1 சதவீதம் சந்தை கட்டணமாக வசூலிக்கப்படுகின்றது. தற்போது நிலவி வரும் சூழ்நிலையை கருத்தில் கொண்டு, விவசாயிகளிடம் இருந்து கொள்முதல் செய்யப்படும் விளைபொருட்களை நியாயமான விலையில், பொதுமக்களுக்கு வினியோகம் செய்ய ஏதுவாக, வியாபாரிகள் செலுத்தும் 1 சதவீத சந்தை கட்டணம் 30-ந் தேதி ரத்து செய்யப்பட்டது. இந்த சலுகையும் மேலும் ஒரு மாத காலத்துக்கு நீட்டிக்கப்படுகிறது.

இவ்வாறு அந்த செய்திக்குறிப்பில் மாவட்ட கலெக்டர் சி.கதிரவன் தெரிவித்து உள்ளார்.