பீடி சுற்றும் தொழிலாளர்கள் வீட்டில் இருந்து உற்பத்தி செய்ய ஏற்பாடு முதல்-அமைச்சரிடம் நெல்லை கலெக்டர் வலியுறுத்தல்

நெல்லை, 

தமிழகம் முழுவதும் கொரோனா வைரஸ் கட்டுப்படுத்துதல் தொடர்பாக மேற்கொள்ளப்பட்டு வரும் மேம்பாட்டு பணிகள் மற்றும் ஊரடங்கு நீட்டிப்பு மற்றும் தளர்வு மேற்கொள்ளுதல் தொடர்பாக முதல்-அமைச்சர் எடப்பாடி பழனிசாமி நேற்று வீடியோ கான்பரன்சிங் மூலம் அனைத்து மாவட்ட கலெக்டர்களுடன் ஆலோசனை நடத்தினார்.

நெல்லை மாவட்டத்தில் நடைபெற்று வரும் கொரோனா தடுப்பு பணிகள் குறித்து கலெக்டர் ஷில்பா, முதல்-அமைச்சரிடம் விளக்கம் அளித்தார். 

அப்போது அவர், பாளையங்கோட்டை, மேலப்பாளையம், ஏர்வாடி, களக்காடு உள்ளிட்ட பகுதிகளில் ஏழை, எளிய மக்களின் பிரதான தொழிலான பீடி சுற்றும் தொழிலாளர்கள் வாழ்வாதாரத்தை கருத்தில் கொண்டு பீடி தொழில் நிறுவனங்கள் மூலப்பொருட்களை தொழிலாளர்கள் வீடுகளுக்கு வழங்கி உற்பத்தி செய்ய வழிவகையும், ஆலோசனை வழங்கிடவும் முதல்-அமைச்சரிடம் வலியுறுத்தினார்.

இதனால் நெல்லை பகுதியில் 53 ஆயிரம் பேர், மேலப்பாளையத்தில் 55 ஆயிரம் பேர், ஏர்வாடியில் 16,514 பேர், அம்பை பகுதியில் 3,604 பேர், சேரன்மாதேவி பகுதியில் 38 ஆயிரம் பேர் உள்பட 12 ஆயிரம் ஆண்கள், 2 லட்சத்து 39 ஆயிரம் பெண்கள் என மொத்தம் 2.51 லட்சம் பீடி தொழிலாளர்கள் பயன்பெறுவார்கள். இந்த தொழிலில் உரிய பாதுகாப்பு வசதிகள் ஏற்பாடு செய்யப்பட்டு உள்ளது என்றும் கலெக்டர் கூறினார்.