செய்யாறு அருகே சாலையின் குறுக்கே மரம், கற்களை வைத்து மறிப்பு - போலீசார் அகற்றினர்

செய்யாறு,

செய்யாறு தாலுகா கொருக்கை, முக்கூர், நாவல், வாழ்குடை உள்ளிட்ட பல கிராமங்களில் இருந்து சிப்காட் தொழிற்பேட்டையில் பணிபுரியும் தொழிலாளர்களை ஏற்றி செல்லும் பஸ்கள், செய்யாற்றைவென்றான் கிராமத்தின் வழியாக மாங்கால் கூட்ரோட்டில் இயங்கும் கம்பெனிக்கு செல்வது வழக்கம். 

தற்போது கொரோனா வைரஸ் தொற்று வேகமாக பரவி வருகிற நிலையில் தொழிற்சாலைக்கு செல்லும் பணியாளர்கள் மூலம் நோய்தொற்று ஏற்படும் அச்சத்தில் தொழிலாளர்கள் பஸ்சில் அழைத்துசெல்ல கிராம மக்கள் எதிர்ப்பு தெரிவித்து வருகின்றனர்.

அதன்வெளிபாடாக செய்யாற்றை வென்றான் கிராமத்தில் இரவோடு இரவாக சாலையின் குறுக்கே காய்ந்த மரத்தினையும், அங்காங்கே கற்களை வைத்தும் பஸ்களை செல்லவிடாமல் தடுத்தனர். தகவல் அறிந்தவுடன் மாவட்ட கூடுதல் போலீஸ் சூப்பிரண்டு ஞானசேகரன் மற்றும் போலீசார் சம்பவ இடத்திற்கு விரைந்து சென்று சாலையில் இருந்த மரம் மற்றும் கற்களை அகற்றி போக்குவரத்தினை சரிசெய்தனர். மேலும் சிப்காட் பஸ்களை போலீசார் பாதுகாப்புடன் அழைத்து சென்றனர்.