அன்னவாசல் பகுதியில் மழை: நெற்பயிர்கள் நீரில் மூழ்கி நாசம் விவசாயிகள் வேதனை

அன்னவாசல், 

அன்னவாசல் பகுதியில் பெய்த மழையில் நெற்பயிர்கள் நீரில் மூழ்கி நாசமடைந்தது. இதனால் விவசாயிகள் வேதனை அடைந்துள்ளனர்.

பயிர்கள் தண்ணீரில் மூழ்கியது

அன்னவாசல் அருகே உள்ள செங்கப்பட்டி, காலாடிப்பட்டி, வீரப்பட்டி, கடம்பராயன்பட்டி, முக்கண்ணாமலைப்பட்டி, புதூர், காட்டுப்பட்டி, குளவாய்ப்பட்டி, கீழக்குறிச்சி, கூத்தினிப்பட்டி உள்பட 20-க்கும் மேற்பட்ட கிராமங்களை சேர்ந்த விவசாயிகள் ஆயிரம் ஏக்கரில் நெல் சாகுபடி செய்துள்ளனர். இவை தற்போது அறுவடைக்கு தயாராகி உள்ள நிலையில் நேற்று முன்தினம் இரவு கோடை மழை கொட்டி தீர்த்தது. இதனால் அறுவடைக்கு தயாராக இருக்கும் நெற்பயிர்களில் 60 சதவீதம் பயிர்கள் தண்ணீரில் மூழ்கியது. இதனால் விளைந்த நெற்கதிர்கள் தண்ணீரில் மூழ்கி இருப்பதால் அவைகள் நாசமாகி விடும் நிலை உள்ளது.

வேதனை

கொரோனா ஊரடங்கினால் ஏற்கனவே பாதிக்கப்பட்டுள்ள நிலையில், விவசாயிகளுக்கு மேலும் பெரும் நஷ்டத்தையும், கஷ்டத்தையும் ஏற்படுத்தும் வகையில் கோடை மழையும் ஒரு காரணமாகி விட்டது. இதனால் ஒரு ஏக்கர் நிலத்திற்கு ரூ.30 ஆயிரம் வரை நஷ்டம் ஏற்படும் என விவசாயிகள் வேதனை தெரிவித்தனர். மேலும் மழையால் நெற்பயிர்கள் நீரில் மூழ்கியதால் பாதிக்கப்பட்ட நெல் சாகுபடி செய்த விவசாயிகளுக்கு உரிய நிவாரணம் வழங்க அரசு நடவடிக்கை எடுக்க வேண்டுமென்று விவசாயிகள் கோரிக்கை விடுத்துள்ளனர். நேற்று முன்தினம் புதுக்கோட்டை மாவட்டத்தில் அன்னவாசலில் 70 மி.மீ. மழை பதிவானது குறிப்பிடத்தக்கது.