சங்கராபுரம் அருகே மோட்டார் சைக்கிள்கள் மோதல்; வாலிபர் பலி

சங்கராபுரம் அருகே உள்ள பழையனூர் கிராமத்தை சேர்ந்தவர் மெய்யப்பன் மகன் அர்ச்சுனன் (வயது 35), கூலி தொழிலாளி. இவர் நேற்று முன்தினம் வளையாம்பட்டில் இருந்து தனது மோட்டார் சைக்கிளில் வீட்டுக்கு வந்து கொண்டு இருந்தார். பழையனூர் காத்தான்குட்டை அருகே வந்த போது, விரியூரில் இருந்து பரமநத்தம் நோக்கி வந்த மோட்டார் சைக்கிள் ஒன்று அர்ச்சுனன் ஓட்டி வந்த மோட்டார் சைக்கிள் மீது மோதியது.

இதில் அர்ச்சுனன் சம்பவ இடத்திலேயே பரிதாபமாக உயிரிழந்தார். பலத்த காயமடைந்த மற்றொரு மோட்டார் சைக்கிளில் வந்த பரமநத்தம் கிராமத்தை சேர்ந்த நல்லதம்பி மகன் இளங்கோவனை அக்கம்பக்கத்தினர் மீட்டு சிகிச்சைக்காக கள்ளக்குறிச்சி அரசு மருத்துவமனையில் சேர்த்தனர். அங்கு அவருக்கு சிகிச்சை அளிக்கப்பட்டு வருகிறது.