காரைக்கால், புதுச்சேரியில் இருந்து 1,119 புலம்பெயர்ந்த தொழிலாளர்கள் மேற்கு வங்காளம், அசாமுக்கு புறப்பட்டனர்

புதுச்சேரி,

நாடு முழுவதும் ஊரடங்கு உத்தரவு அமலில் இருக்கும் நிலையில் புலம்பெயர்ந்த தொழிலாளர்களை சொந்த மாநிலங்களுக்கு அழைத்துச் செல்ல சிறப்பு ரெயில்கள் இயக்கப்பட்டு வருகின்றன. இதன்படி புதுச்சேரியில் இருந்து கடந்த மாதம் 18-ந் தேதி பீகார் மற்றும் உத்தரப்பிரதேசத்துக்கு சிறப்பு ரெயில் இயக்கப்பட்டது. இந்த ரெயிலில் 1,200 பேர் புறப்பட்டுச் சென்றனர். கடந்த வாரம் ஒடிசா மாநிலத்துக்கு மேலும் ஒரு சிறப்பு ரெயில் இயக்கப்பட்டது. இந்த ரெயிலில் 1,500 பேர் சென்றனர்.

இந்த நிலையில் காரைக்காலில் இருந்து புதுச்சேரி வழியாக மேற்கு வங்காளத்துக்கு சிறப்பு ரெயில் நேற்று மாலை 3 மணிக்கு இயக்கப்பட்டது. அங்கிருந்து மேற்கு வங்காளம், அசாமைச் சேர்ந்த 291 புலம்பெயர்ந்த தொழிலாளர்கள் புறப்பட்டனர். ரெயிலை மாவட்ட கலெக்டர் அர்ஜூன் சர்மா கொடியசைத்து வழியனுப்பினார். இதில் மாவட்ட சீனியர் போலீஸ் சூப்பிரண்டு மகேஷ்குமார் பன்வால், துணை கலெக்டர்கள் ஆதர்ஷ், பாஸ்கரன் உள்ளிட்ட பலர் கலந்துகொண்டனர். முன்னதாக அனைத்து தொழிலாளர்களுக்கும் கொரோனா பரிசோதனை செய்யப்பட்டு உணவு, தண்ணீர் வழங்கப்பட்டது.

இந்த ரெயிலில் அனுப்பி வைப்பதற்காக புதுவையில் பல்வேறு பகுதிகளில் வசித்து வந்த மேற்கு வங்காளத்தை சேர்ந்தவர்கள் அரசின் சாலை போக்குவரத்து கழக பஸ்கள் மூலம் உப்பளம் மைதானத்திற்கு அழைத்து வரப்பட்டனர். அங்கு அவர்களுக்கு மருத்துவ பரிசோதனை செய்யப்பட்டு உணவு, தண்ணீர் பாட்டில்கள் வழங்கப்பட்டன. மாலையில் அவர்கள் பஸ் மூலமாக ரெயில் நிலையத்திற்கு அழைத்து வரப்பட்டனர். காரைக்காலில் இருந்து நேற்று இரவு 8மணிக்கு இந்த ரெயில் புதுவை ரெயில் நிலையத்துக்கு வந்தது.

சிறப்பு ரெயிலை இரவு 9மணி அளவில் முதல்- அமைச்சர் நாராயணசாமி கொடி அசைத்து வழியனுப்பி வைத்தார். அவருடன் அமைச்சர் கந்தசாமி, ஜெயமூர்த்தி எம்.எல்.ஏ., மாவட்ட கலெக்டர் அருண், போலீஸ் டி.ஜி.பி. பாலாஜி ஸ்ரீவஸ்தவா, அரசு செயலர் (தொழிலாளர்) வல்லவன், உதவி கலெக்டர் அஸ்வின் சந்துரு, துணை கலெக்டர்கள் சுதாகர், சக்திவேல், தமிழ்ச்செல்வன், சீனியர் போலீஸ் சூப்பிரண்டு ராகுல் அல்வால் மற்றும் அதிகாரிகள் பலர் உடனிருந்தனர்.

இந்த ரெயிலில் காரைக்காலில் இருந்து 291 பேர் புதுச்சேரியில் இருந்து 828 பேர் என மொத்தம் 1,119 பேர் மேற்கு வங்காளத்துக்குஅனுப்பி வைக்கப்பட்டனர்.