புதுச்சேரியில் வேகமாக பரவுகிறது: ஒரேநாளில் டாக்டர் உள்பட 9 பேருக்கு கொரோனா

புதுச்சேரி,


இந்தவகையில் கொரோனா வைரஸ் தொற்றானது சாதாரண மக்களை மட்டுமின்றி சிகிச்சை அளிக்கும் டாக்டர்களையும் விட்டு வைக்கவில்லை. ஜிப்மரில் பணியாற்றி வந்த 4 பயிற்சி டாக்டர்களுக்கு நேற்று முன்தினம் தொற்று பாதிப்பு உறுதியானது.

இந்தநிலையில் நேற்று மேலும் ஒரு பயிற்சி டாக்டருக்கு கொரோனா தொற்று உறுதி செய்யப்பட்டுள்ளது. இதைத்தொடர்ந்து அவர் தங்கி இருந்த விடுதி மூடப்பட்டது. ஜிப்மர் மருத்துவமனை தொழில்நுட்ப உதவியாளர் ஒருவருக்கும், ஊர்க்காவல் படை வீரர் ஒருவருக்கும் கொரோனா பாதிப்பு ஏற்பட்டுள்ளது. மேலும் பயிற்சி டாக்டருடன் தொடர்பில் இருந்த அவரது உறவினர்கள் 3 பேர், மேலும் 3 பேர் என 9 பேருக்கு புதிதாக கொரோனா தொற்று உறுதிசெய்யப்பட்டுள்ளது.

இவர்களையும் சேர்த்து புதுச்சேரியில் கொரோனாவால் பாதிக்கப்பட்டவர்களின் எண்ணிக்கை 119 ஆக அதிகரித்துள்ளது. நேற்றைய தினம் 2பேர் குணமடைந்து வீடு திரும்பினர். ஏற்கனவே 47 பேர் குணமடைந்து வீடு திரும்பியுள்ளனர். தற்போது 70 பேர் தொற்றினால் பாதிக்கப்பட்டு ஆஸ்பத்திரியில் சிகிச்சை பெற்று வருகின்றனர்.