கள்ளக்குறிச்சியில் 20 பேருக்கு கொரோனா

கள்ளக்குறிச்சி மாவட்டத்தில் கொரோனா வைரசால் ஏற்கனவே 272 பேர் பாதிக்கப்பட்டுள்ளனர். இந்த நிலையில் நேற்று 259 பேரின் கொரோனா பரிசோதனை முடிவுகள் வெளிவந்தது. இதில் மராட்டியம், புதுடெல்லி ஆகிய மாநிலங்களிலிருந்து கள்ளக்குறிச்சி மாவட்டத்துக்கு வந்த 11 பேர் மற்றும் கொரோனா பாதித்தவர்களுடன் தொடர்பில் இருந்த 9 பேர் என மொத்தம் 20 பேருக்கு கொரோனா தொற்று இருப்பது உறுதி செய்யப்பட்டது.

இதையடுத்து அவர்கள் அனைவரும் சிகிச்சைக்காக மருத்துவமனைகளில் அனுமதிக்கப்பட்டுள்ளனர். இதன் மூலம் கள்ளக்குறிச்சி மாவட்டத்தில் கொரோனா வைரசால் பாதிக்கப்பட்டவர்களின் மொத்த எண்ணிக்கை 272-ல் இருந்து 292 ஆக உயர்ந்துள்ளது. இதில் 234 பேர் குணமடைந்து வீடு திரும்பியுள்ளனர். ஒருவர் சிகிச்சை பலனின்றி இறந்துள்ளார்.

விழுப்புரம் மாவட்டத்தில் நேற்று முன்தினம் வரை கொரோனா வைரஸ் நோயால் 380 பேர் பாதிக்கப்பட்டிருந்தனர். இவர்களில் ஏற்கனவே 3 பேர் சிகிச்சை பலனின்றி இறந்துள்ள நிலையில் 329 பேர் பூரண குணமடைந்து வீட்டிற்கு அனுப்பி வைக்கப்பட்டுள்ளனர். மீதமுள்ள 48 பேர் அரசு மருத்துவமனைகளில் தொடர்ந்து சிகிச்சையில் இருந்து வருகின்றனர்.

இந்நிலையில் கொரோனா பரிசோதனை செய்யப்பட்டவர்களில் நேற்று சிலரின் மருத்துவ பரிசோதனை அறிக்கைகளின் முடிவுகள் வந்தது. இதில் மேலும் 4 பேருக்கு கொரோனா நோய் தொற்று இருப்பது உறுதி செய்யப்பட்டுள்ளது.

இவர்களில் திண்டிவனம்- மரக்காணம் சாலையை சேர்ந்த 45 வயதுடைய பொக்லைன் எந்திர ஆபரேட்டரும், செஞ்சி தாலுகா சின்னபொன்னம்பூண்டியை சேர்ந்த 28 வயதுடைய பெண்ணும், விழுப்புரம் அருகே வளவனூர சேர்ந்த 31 வயதுடைய ஒருவரும், விக்கிரவாண்டி மேட்டு தெருவை சேர்ந்த 45 வயதுடைய ஒருவரும் கொரோனா நோயால் பாதிக்கப்பட்டுள்ளனர்.

இவர்களில் அந்த பெண், மும்பையில் இருந்து வந்தவர், வளவனூரை சேர்ந்தவர் புதுச்சேரி அரசு மருத்துவமனையில் உறவினரை பார்த்து விட்டு வந்தவர், விக்கிரவாண்டியை சேர்ந்தவர் கோயம்பேடு சந்தையில் இருந்து வந்தவர் ஆவார்கள்.

இதையடுத்து அவர்கள் 4 பேரும் முண்டியம்பாக்கம் அரசு மருத்துவ கல்லூரி மருத்துவமனையில் அனுமதிக்கப்பட்டு தீவிர சிகிச்சை பெற்று வருகின்றனர். மாவட்டத்தில் கொரோனா நோயால் பாதிக்கப்பட்டோரின் எண்ணிக்கை 384 ஆக உயர்ந்துள்ளது. மேலும் மராட்டியம் உள்ளிட்ட வெளிமாநிலங்களில் இருந்து வந்த 203 பேர் தனிமைப்படுத்தும் முகாம்களில் தங்க வைக்கப்பட்டும், கொரோனா முன்எச்சரிக்கை தொடர்பாக 318 பேர் அவரவர் வீடுகளிலும் தனிமைப்படுத்தப்பட்டு கண்காணிக்கப்பட்டு வருகின்றனர்.