நாமக்கல் உழவர் சந்தையில் ரூ.3 லட்சத்துக்கு காய்கறி, பழங்கள் விற்பனை

நாமக்கல்,

கொரோனா வைரஸ் பரவலை தடுக்க நாமக்கல் மாவட்டத்தில் ஊரடங்கு உத்தரவு பிறப்பிக்கப்பட்டு அமலில் இருந்து வருகிறது. இதையொட்டி நாமக்கல் உழவர் சந்தை சுமார் 2½ மாதங்களாக மூடப்பட்டு உள்ளது. இங்கு செயல்பட்டு வந்த கடைகள் நாமக்கல் தெற்கு அரசினர் ஆண்கள் மேல்நிலைப்பள்ளி வளாகத்தில் தற்காலிகமாக செயல்பட்டு வருகின்றன.

இங்கு நேற்று 7 டன் காய்கறிகள் மற்றும் 3 டன் பழங்கள் விற்பனைக்கு வந்து இருந்தன. இவை ரூ.2 லட்சத்து 96 ஆயிரத்து 175-க்கு விற்பனை செய்யப்பட்டதாக உழவர் சந்தை அதிகாரிகள் தெரிவித்தனர்.

இந்த கடைகளில் தக்காளி கிலோ ரூ.18-க்கும், கத்தரி கிலோ ரூ.24-க்கும், வெண்டைக்காய் கிலோ ரூ.20-க்கும், புடலங்காய் கிலோ ரூ.28-க்கும், கேரட் கிலோ ரூ.36-க்கும், பீட்ரூட் கிலோ ரூ.28-க்கும், பீன்ஸ் கிலோ ரூ.40-க்கும், இஞ்சி கிலோ ரூ.90-க்கும் விற்பனை செய்யப்பட்டன. சின்ன வெங்காயம் கிலோ ரூ.35-க்கும், பெரிய வெங்காயம் ரூ.22-க்கும் விற்பனை செய்யப்பட்டன.

சின்ன வெங்காயம் வரத்து அதிகரித்து இருப்பதால் அதன் விலை கிலோவுக்கு ரூ.5 குறைந்து உள்ளதாக அதிகாரிகள் தெரிவித்தனர். கடந்த வாரம் சின்ன வெங்காயம் கிலோ ரூ.40-க்கு விற்பனை செய்யப்பட்டது குறிப்பிடத்தக்கது.