காட்டன் சூதாட்டத்தில் கைதானவர் குடியாத்தம் கிளை சிறையில் கைதி திடீர் சாவு வேலூரை சேர்ந்தவர்

குடியாத்தம்,

வேலூர் ஆர்.என்.பாளையம் புதுஜண்டா தெருவைச் சேர்ந்தவர் அப்துல் ரகுமான். இவரின் மகன் இஸ்மாயில் பாஷா (வயது 42). இவர், நேற்று முன்தினம் காட்டன் சூதாட்டத்தில் ஈடுபட்டதாக வேலூர் தெற்குப் போலீசார் கைது செய்து, குடியாத்தம் கிளை சிறையில் இரவு அடைத்தனர்.

இந்த நிலையில் நேற்று காலை 10 மணியளவில் குடியாத்தம் கிளை சிறையில் இருந்த இஸ்மாயில்பாஷாவுக்கு திடீரென உடல் நலப் பாதிப்பு ஏற்பட்டது. அவரை, கிளை சிறை அதிகாரிகள் குடியாத்தம் அரசு மருத்துவமனைக்கு அழைத்துச் சென்றனர். அங்கு, அவரை பரிசோதித்த டாக்டர்கள், இஸ்மாயில்பாஷா ஏற்கனவே இறந்து விட்டதாக தெரிவித்தனர். அவரின் உடலை பிரேதப் பரிசோதனைக்காக மருத்துவமனை பிணவறையில் வைத்தனர்.

இதுகுறித்து குடியாத்தம் டவுன் போலீசில் குடியாத்தம் கிளை சிறை கண்காணிப்பாளர் பூவேந்திரன் புகார் அளித்தார். அதன்பேரில் துணை போலீஸ் சூப்பிரண்டு சரவணன், டவுன் போலீஸ் இன்ஸ்பெக்டர் சீனிவாசன், சப்-இன்ஸ்பெக்டர்கள் மணிகண்டன், ரவி ஆகியோர் வழக்குப்பதிவு செய்து விசாரணை நடத்தினர்.

இஸ்மாயில்பாஷா இறந்த தகவல் அறிந்ததும், அவரின் உறவினர்கள் வேலூரில் இருந்து குடியாத்தம் அரசு மருத்துவமனைக்கு வந்து அவரின் உடலை பார்த்து கதறி அழுதனர். அவரின் உடலை குடியாத்தத்தில் இருந்து வேலூர் அடுக்கம்பாறை அரசு மருத்துவக் கல்லூரி மருத்துவமனைக்கு பிரேதப் பரிசோதனைக்காக அனுப்பி வைத்தனர். இறந்த இஸ்மாயில் பாஷாவுக்கு மனைவி, இரு மகள்கள் உள்ளனர்.

கிளை சிறையில் அடைக்கப்பட்டவர் இறந்த சம்பவம் வேலூரில் பரபரப்பை ஏற்படுத்தி உள்ளது.