3-வது நாளாக கொட்டி தீர்த்த மழை மும்பை வெள்ளத்தில் மிதக்கிறது அடுத்த 2 நாட்களுக்கும் கனமழை எச்சரிக்கை


3-வது நாளாக கொட்டி தீர்த்த மழை மும்பை வெள்ளத்தில் மிதக்கிறது அடுத்த 2 நாட்களுக்கும் கனமழை எச்சரிக்கை
x
தினத்தந்தி 5 July 2020 11:30 PM GMT (Updated: 2020-07-06T03:04:12+05:30)

மும்பையில் 3-வது நாளாக கொட்டித்தீர்த்த கனமழையால் நகரமே வெள்ளத்தில் மிதக்கிறது.

மும்பை,

மும்பையில் 3-வது நாளாக கொட்டித்தீர்த்த கனமழையால் நகரமே வெள்ளத்தில் மிதக்கிறது. அடுத்த 2 நாட்களுக்கும் பலத்த மழை பெய்யும் என எச்சரிக்கை விடுக்கப்பட்டு உள்ளது.

3-வது நாளாக மழை

கொரோனா வைரஸ் பரவலால் திண்டாடி வரும் மராட்டியத்தில் மும்பை மற்றும் அதையொட்டி உள்ள கடலோர மாவட்டங்களில் கடந்த வெள்ளிக்கிழமை முதல் பலத்த மழை பெய்து வருகிறது. நேற்று முன்தினம் பெய்த கனமழையால் மும்பை நகரம் வெள்ளக்காடானது. நேற்றும் மும்பையில் 3-வது நாளாக மழை வெளுத்து வாங்கியது. அதிகாலை முதலே இடைவிடாமல் பெய்த மழை மதியம் 3 மணி வரை நீடித்தது.

இதனால் மும்பை நகரம் வெள்ளத்தில் மிதந்தது. குறிப்பாக தாழ்வான பகுதிகள் மழைநீரில் தத்தளித்தன. இதில் மும்பை போஸ்டல் காலனி, செம்பூர், சாக்கர் பஞ்சாயத் ரோடு, வடலா மேற்கு, நீலம் ஜங்ஷன், தாராவி ரெஸ்ட்ரான்ட், அந்தேரி மிலன் சப்வே, இந்துமாதா ஜங்ஷன், சுரனா ஆஸ்பத்திரி, செம்பூர்- சாந்தாகுருஸ் இணைப்பு பாலம், கார் சப்வே, சாய்வாடி ஜங்ஷன், அந்தேரி மார்க்கெட், அந்தேரி சப்வே, ஷாம் தலாவ், சாய்னாத் சப்வே, மலாடு எஸ்.வி. ரோடு, தகிசர் சப்வே, மரோல் ஜங்ஷன், குர்லா பன்டர் பவன், பவாய் காந்திநகர் உள்ளிட்ட பல்வேறு இடங்களில் வெள்ளம் ஏற்பட்டது.

இதேபோல நகரில் பல பகுதிகளில் அடுக்குமாடி குடியிருப்புகள், குடிசைப்பகுதிகளும் தண்ணீரில் தத்தளித்தன. பல இடங்களில் மக்கள் இடுப்பு அளவு தண்ணீரில் நடந்து செல்வதை காண முடிந்தது.

கடல் சீற்றம்

மழையையொட்டி அரபிக்கடல் கொந்தளிப்பாக காணப்பட்டது. குறிப்பாக மதியம் 12.30 மணியளவில் கடல் அலை சீற்றம் அதிகமாக இருந்தது. சுமார் 4½ மீட்டர் உயரத்துக்கு ‘கேட்வே ஆப் இந்தியா’, மெரின் டிரைவ், பாந்திரா பேண்டு ஸ்டாண்டு உள்ளிட்ட பகுதிகளில் ராட்சத அலை கரையை தாக்கியது.

இதனால் 2-வது நாளாக பாந்திரா ேபண்டு ஸ்டாண்டு பகுதியில் கடல்நீர் குடியிருப்பு பகுதிக்குள் புகுந்தது. இதன் காரணமாக குடியிருப்பு மக்கள் அச்சம் அடைந்தனர்.

பவாய் ஏரி நிரம்பியது

இதேபோல மும்பையில் பெய்த பலத்த மழையால் பவாய் ஏரி நிரம்பியது. ஏரியில் இருந்து தற்போது உபரி நீர் வெளியேறி வருகிறது. இந்த ஏரி தண்ணீர் தொழிற்சாலை பயன்பாட்டுக்கு மட்டும் உபயோகப்படுத்தப்படுகிறது. மேலும் மும்பைக்கு குடிநீர் வழங்கும் ஏரிகளின் நீர்மட்டமும் உயர்ந்து உள்ளது.

கனமழை காரணமாக ஒரு சில இடங்களில் மரம் விழுந்தது. சுவர் இடிந்து விழுந்தது. மின்கசிவு பிரச்சினை போன்றவற்றை தவிர ெபரிய பாதிப்புகள் எதுவும் ஏற்படவில்லை என தீயணைப்பு துறை அதிகாரி ஒருவர் தெரிவித்தார்.

தானே, நவிமும்பை

மும்பையை போல நேற்று தானே, நவிமும்பை, பால்கர் பகுதிகளிலும் பலத்த மழை பெய்தது. அங்கு தாழ்வான பகுதிகளில் மழைநீர் தேங்கியது. வாஷி ஏ.பி.எம்.சி. மார்க்கெட் ரோட்டில் தேங்கிய வெள்ளத்தில் வாகனங்கள் தத்தளித்தபடி சென்றன. தானேயில் தண்டவாளங்களிலும் மழைநீர் தேங்கியது. எனினும் அத்தியாவசிய பணியாளர்களுக்கான ரெயில்சேவை பாதிக்கப்படவில்லை என ரெயில்வே அதிகாரி ஒருவர் கூறினார்.

தானே தெலிகல்லி பகுதியில் பாழடைந்த ஒரு மாடி கட்டிடம் இடிந்து விழுந்தது. அபாயநிலையில் இருந்த அந்த கட்டிடத்தில் யாரும் வசிக்காததால் இந்த விபத்தில உயிரிழப்புகள் எதுவும் ஏற்படவில்லை. அங்கு மாநகராட்சியினர் மீட்பு பணிகளில் ஈடுபட்டனர்.

மழை அளவு

மும்பையை பொறுத்தவரை நேற்று காலை 8.30 மணியுடன் முடிவடைந்த 24 மணி நேரத்தில் நகரில் 13 செ.மீ. மழையும், புறநகரில் 20 செ.மீ. மழையும் பதிவாகி இருந்தது. இதில் அதிகபட்சமாக போரிவிலியில் 21 செ.மீ. மழையும், விக்ரோலி, செம்பூரில் 20 செ.மீ. மழையும் பதிவாகி இருந்தது. தாராவியில் 19 செ.மீ. மழை பதிவானது.

தானேயில் 37 செ.மீ. மழையும், பால்கரில் 9 செ.மீ. மழையும் பதிவாகி இருந்தது.

மீண்டும் கனமழை எச்சரிக்கை

இதற்கிடையே அடுத்த 2 நாட்களுக்கும் கனமழை பெய்யும் என எச்சரிக்கை விடுக்கப்பட்டு உள்ளது. இது குறித்து வானிலை ஆய்வு மையம் வெளியிட்டு உள்ள செய்திக்குறிப்பில், “மராட்டியத்தின் பல பகுதிகளில் இன்றும்(திங்கட்கிழமை), நாளையும்(செவ்வாய்க்கிழமை) கனமழை தொடரும். அப்போது மணிக்கு 50 முதல் 60 கி.மீ. வேகத்தில் சூறாவளி காற்று வீசும். மும்பை, தானே, பால்கர், ராய்காட், ரத்னகிரி போன்ற கடலோர மாவட்டங்களில் கனமழை அல்லது மிக கனமழை பெய்யும்.

இதேபோல புனே, நாசிக், துலே, ஜல்காவ், நந்துர்பர், சத்தாரா, கோலாப்பூர், பர்பானி, நாந்தெட், ஹிங்கோலி ஆகிய மாவட்டங்களிலும் பலத்த மழை பெய்ய வாய்ப்பு உள்ளது. எனவே மீனவர்கள் அடுத்த 2 நாட்களுக்கு கடலுக்கு செல்ல வேண்டாம். பொதுமக்கள் வீட்டை விட்டு வெளியே வருவதை தவிர்க்க வேண்டும்” என்று தெரிவிக்கப்பட்டு உள்ளது.

Next Story