நெமிலி அருகே பெயிண்டர் வெட்டிக்கொலை நண்பரிடம் விசாரணை

அரக்கோணம்,

நெமிலி அருகே பெயிண்டர் வெட்டிக்கொலை செய்யப்பட்டார். அவரை வீட்டில் இருந்து வெளியே அழைத்து சென்ற நண்பரிடம் போலீசார் விசாரணை நடத்தி வருகின்றனர்.

பெயிண்டர் வெட்டிக்கொலை

ராணிப்பேட்டை மாவட்டம், நெமிலி அருகே திருமால்பூரில் இருந்து வஞ்சூர் செல்லும் சாலையில் கீழ்வெண்பாக்கம் என்ற இடத்தில் நேற்று முன் தினம் இரவு காலிமனையில் வாலிபர் ஒருவர் காயங்களுடன் இறந்து கிடப்பதாக நெமிலி போலீசாருக்கு தகவல் கிடைத்தது.

அதன்பேரில் சப்-இன்ஸ்பெக்டர் சீனிவாசன் மற்றும் போலீசார் சம்பவ இடத்திற்கு சென்று விசாரணை நடத்தினார்கள். இறந்தவரின் தலை, கழுத்து பகுதியில் கத்தியால் வெட்டிக் கொலை செய்திருப்பது தெரியவந்தது. போலீசார் இறந்தவரின் உடலை கைப்பற்றி பிரேத பரிசோதனைக்காக வேலூர் அடுக்கம்பாறையில் உள்ள அரசு மருத்துவமனைக்கு அனுப்பி வைத்தனர்.

கொலை நடந்த இடத்தில் இருந்து சிறிது தூரத்தில் மதுபாட்டில்கள், செல்போன், ஹெட்போன் ஆகியவை கிடந்தது. இதுகுறித்து நெமிலி போலீசார் வழக்குப்பதிவு செய்து விசாரணை நடத்தி வந்தனர்.

விசாரணையில், இறந்தவர் காஞ்சீபுரம் மாவட்டம், முட்டவாக்கம் கிராமத்தை சேர்ந்த பூங்காவனம் என்பவரின் மகன் அஜித்குமார் (வயது 23) என்பதும், பெயிண்டர் என்பதும், நேற்று முன்தினம் காலை வீட்டில் இருந்து நண்பருடன் சென்றவர் மீண்டும் வீட்டிற்கு வரவில்லை என்பதும் தெரிய வந்தது.

நண்பரிடம் விசாரணை

அஜித்குமாரை வீட்டில் இருந்து அழைத்து சென்ற நண்பர் காஞ்சீபுரம் மாவட்டம் வதியூரை சேர்ந்த விக்கி என்ற விக்னேசை (24) பிடித்து போலீசார் விசாரணை நடத்தி வருகின்றனர்.

மேலும் மதுஅருந்தும் போது நண்பர்களுக்குள் தகராறு ஏற்பட்டு அஜித்குமார் வெட்டி கொலை செய்யப்பட்டாரா? அல்லது வேறு காரணம் இருக்குமா? என பல்வேறு கோணங்களில் போலீசார் விசாரணை நடத்தி வருகின்றனர்.

ராணிப்பேட்டை மாவட்ட போலீஸ் சூப்பிரண்டு மயில்வாகனன் உத்தரவின்பேரில் அரக்கோணம் துணை போலீஸ் சூப்பிரண்டு மனோகரன் மேற்பார்வையில் இன்ஸ்பெக்டர்கள் லட்சுமிபதி (காவேரிப்பாக்கம்), அண்ணாதுரை (அரக்கோணம் தாலுகா), பரந்தாமன் (கலால்) ஆகிய 3 பேர் தலைமையில், கொலையாளிகளை காஞ்சீபுரம், திருவள்ளூர், அரக்கோணம், திருத்தணி ஆகிய பகுதிகளில் தனிப்படையினர் தேடி வருகின்றனர்.

இந்த சம்பவம் அந்த பகுதியில் பரபரப்பை ஏற்படுத்தி உள்ளது.