மேல்செங்கம் போலீஸ் நிலையத்திற்கு சென்ற பெண் ‘திடீர்’ சாவு நடவடிக்கை எடுக்கக்கோரி உறவினர்கள் தர்ணா

திருவண்ணாமலை,

மேல்செங்கம் போலீஸ் நிலையத்திற்கு சென்ற பெண் திடீரென உயிரிழந்தார். போலீசார் மீது நடவடிக்கை எடுக்கக்கோரி உறவினர்கள் தர்ணா போராட்டத்தில் ஈடுபட்டனர்.

நிலத்தகராறு

திருவண்ணாமலை மாவட்டம், செங்கம் அருகே உள்ள அந்தனூர் மதுரா கிராமத்தை சேர்ந்தவர் தர்மலிங்கம். அவருடைய மனைவி சுதர்சனா(வயது 42). இவர்களுக்கு 2 மகன்கள் உள்ளனர். தர்மலிங்கத்துக்கும் அவரது சகோதரருக்கும் இடையே நிலம் தொடர்பாக தகராறு ஏற்பட்டுள்ளது. இதுசம்பந்தமாக மேல்சங்கம் போலீசில் புகார் அளிக்கப்பட்டது. அதன்பேரில் போலீசார் விசாரணை மேற்கொண்டு வந்தனர்.

இதுதொடர்பாக சுதர்சனாவின் மகன், கணவர், சகோதரர் ஆகியோரிடம் போலீசார் விசாரணை மேற்கொண்டு நடவடிக்கை எடுத்ததாக தெரிகிறது. இந்த தகராறில் சுதர்சனாவின் மகனுக்கு எந்த தொடர்பும் இல்லை என சுதர்சனா கூறி வந்தார். இதுகுறித்து போலீசாரிடம் நியாயம் கேட்க சம்பவத்தன்று மேல்செங்கம் போலீஸ் நிலையத்திற்கு சுதர்சனா சென்றதாக கூறப்படுகிறது.

சிகிச்சை பலனின்றி சாவு

இதையடுத்து பெண் காவலர் ஒருவர் சுதர்சனாவின் வீட்டுக்கு சென்று அவரது சகோதரர் முனிராஜிடம் சுதர்சனா விஷம் குடித்து விட்டதாக தெரிவித்தார். அதன்பேரில் உறவினர்கள் போலீஸ் நிலையத்திற்கு சென்றனர். அப்போது அங்கிருந்தவர்கள் சுதர்சனாவை சிகிச்சைக்காக செங்கம் மருத்துவமனைக்கு அழைத்துச் சென்றுள்ளதாக தெரிவித்தனர். பின்னர் அங்கிருந்து மேல் சிகிச்சைக்காக திருவண்ணாமலை அரசு மருத்துவமனைக்கு அனுப்பி வைக்கப்பட்டார்.

இந்த நிலையில் சுதர்சனா நேற்று காலை சிகிச்சை பலனின்றி பரிதாபமாக உயிரிழந்தார். இதனால் ஆத்திரமடைந்த சுதர்சனாவின் உறவினர்கள் மேல்செங்கம் போலீசார் தான் சுதர்சனாவை தற்கொலைக்கு தூண்டினர். எனவே போலீசார் மீது நடவடிக்கை எடுக்கக்கோரி உடலை வாங்க மறுத்து மருத்துவமனை முன்பு அமர்ந்து தர்ணாவில் ஈடுபட்டனர். பின்னர் போலீசார் சம்பவ இடத்துக்கு சென்று அவர்களிடம் பேச்சுவார்த்தை நடத்தினர். அதை தொடர்ந்து தர்ணாவை கைவிட்டனர்.

இந்த சம்பவம் திருவண்ணாமலை, மேல்செங்கத்தில் பரபரப்பை ஏற்படுத்தி உள்ளது.