ஆடி மாத பிறப்பு: கரூரில், தேங்காயை சுட்டு கொண்டாட்டம்

கரூர்,

ஆடி மாதம் என்றாலே அம்மன் மாதம் என்று அழைக்கும் வகையில், அம்மன் கோவில்களில் ஆடி மாதம் முழுவதும் விசேஷ நிகழ்ச்சிகள் களைகட்டும். இந்த மாதம் வரும் வெள்ளிக்கிழமைகளில் அம்மனுக்கு சிறப்பு அலங்காரம், வழிபாடு என்று தமிழகம் முழுவதும் விழாக்கோலம் காணும்.

கரூர் மாவட்டத்தை பொறுத்தவரையில் ஆடி முதல் நாளே இந்த கொண்டாட்டம் களைகட்டி விடும். அதாவது அன்றைய தினம் தேங்காய் சுடும் பண்டிகையுடன் பக்தர்கள் ஆன்மிக வழிபாட்டை தொடங்கி விடுவார்கள்.

அதன்படி, நேற்று ஆடி மாதம் பிறந்ததையொட்டி கரூர் அமராவதி ஆற்று படித்துறை பகுதியில் பொதுமக்கள் தேங்காய் சுடும் பண்டிகையை உற்சாகமாக கொண்டாடினர். இதற்காக அருகிலுள்ள கடைகளுக்கு சென்று தேங்காய்களை சுடும் அழிஞ்சி குச்சி மற்றும் தேங்காய்களை வாங்கினர். அவ்வாறு வாங்கி வந்த தேங்காயை தரையில் நன்றாக உருட்டி சுத்தப்படுத்தினர். பின்னர் தேங்காயில் உள்ள 3 கண்களில் ஒன்றில் ஓட்டை போட்டு பொட்டுக்கடலை, நாட்டு சர்க்கரை, எள், அவல் உள்ளிட்ட பொருட் களை உள்ளே போட்டு மூடினர். பின்னர் நெருப்பு மூட்டி அரை மணி நேரத்திற்கு மேலாக சுட்டனர். நன்றாக சுடப்பட்ட தேங்காயை உடைத்து, அமராவதி ஆற்று கரையோரத்தில் உள்ள விநாயகருக்கு படையலிட்டு உறவினர்கள், நண்பர்களுக்கு கொடுத்து உண்டு மகிழ்ந்தனர்.

இதுகுறித்து வழிபாட்டில் ஈடுபட்ட அப்பகுதியை சேர்ந்த பெண் அபிராமி கூறுகையில், பாரம்பரியமாக ஆடி மாதம் முதல் நாளில் தேங்காய் சுட்டு கொண்டாடுவதை வழக்கமாக கொண்டுள்ளோம். வருடந்தோறும் குடும்பத்தினர் அனைவரும் நோய் நொடி இல்லாமல் வாழவும், நாட்டில் பஞ்சம் வராமல் இருக்கவும் அம்மனை வேண்டுவோம். இம்முறை கொரோனா அழிந்து மக்கள் பஞ்சமில்லாமல் வாழ வேண்டும் என அம்மனை வேண்டி வணங்கினோம், என்றார்.

சிலர் கொரோனா பரவல் காரணமாக ஆடிப்பண்டிகையை தங்களது வீடுகளிலேயே கொண்டாடி மகிழ்ந்தனர். இதனால் கரூர் மாவட்டத்தில் ஆடிப்பண்டிகை களை இழந்து காணப்பட்டது.