க.பரமத்தியில் காதலித்த பெண் வீட்டிற்கு சென்று கத்தியால் கழுத்தில் வெட்டிக்கொண்ட வாலிபர்

க.பரமத்தி,

திண்டுக்கல் மாவட்டம் முத்துராமன்பட்டியை சேர்ந்தவர் சக்திவேல். இவருடைய மகன் கருப்புசாமி(வயது 24). இவர் ஈரோடு மாவட்டம் சோலாரில் தங்கி சமையல் வேலை செய்து வந்தார். இவர் கரூர் மாவட்டம் க.பரமத்தியில் உள்ள அவருடைய நண்பர் வீட்டிற்கு அடிக்கடி வந்து சென்றார்.

அப்போது க.பரமத்தி அன்னை நகரை சேர்ந்த ஒரு கல்லூரி மாணவி மீது கருப்புசாமிக்கு காதல் ஏற்பட்டது. கடந்த ஒரு ஆண்டாக அவர், அந்த மாணவியை காதலித்து வந்ததாக தெரிகிறது.

இந்த நிலையில் கடந்த ஒரு வாரமாக போனில் அந்த மாணவி பேசாத காரணத்தால், நேற்று மதியம் அந்த மாணவியின் வீட்டிற்கு கருப்புசாமி வந்தார். அவர், அந்த மாணவியிடம், ஏன் என்னிடம் பேச மறுக்கிறாய் என்று கேட்டு பிரச்சினை செய்துள்ளார். மேலும் தனது கையில் வைத்திருந்த கத்தியால் இடதுகை மற்றும் கழுத்தில் வெட்டிக்கொண்டார்.

இதில் காயமடைந்த அவரை அருகில் இருந்தவர்கள் மீட்டு தனியார் ஆம்புலன்ஸ் மூலம் கரூர் அமராவதி மருத்துவமனையில் சிகிச்சைக்காக சேர்த்தனர். இந்த சம்பவம் குறித்து அந்த மாணவியின் தந்தை க.பரமத்தி போலீசில், தனது மகளிடம் தகராறில் ஈடுபட்டதாக கருப்புசாமி மீது புகார் கொடுத்தார். அதன்பேரில் போலீசார் வழக்குப்பதிவு செய்து விசாரணை நடத்தி வருகின்றனர்.