ஒகளூரில், ஓடையில் பிணமாக கிடந்த விவசாயி - கொலையா? போலீசார் விசாரணை

மங்களமேடு, 

பெரம்பலூர் மாவட்டம் மங்களமேட்டை அடுத்துள்ள ஒகளூர் கிராமத்தை சேர்ந்தவர் விஜயகுமார்(வயது 40). விவசாயி. இவருக்கு திருமணமாகி அருந்தவம் என்ற மனைவியும், விமல்ராஜ், ஆர்த்தி என்ற 2 குழந்தைகளும் உள்ளனர். விஜயகுமார் நேற்று முன்தினம் விவசாய வேலைக்காக சென்றார். ஆனால் அவர் இரவு வரை வீடு திரும்பவில்லை.

இந்நிலையில் நேற்று காலை நரி ஓடை பகுதியில் சிறுவர்கள் விளாம்பழம் பொறுக்க சென்றனர். அப்போது நரி ஓடையில் ஒருவர் இறந்து கிடந்தார். இதைப்பார்த்த சிறுவர்கள், அலறி அடித்துக்கொண்டு ஊருக்குள் சென்று தகவல் தெரிவித்தனர்.

இது பற்றி அறிந்த மங்களமேடு போலீசார் அங்கு சென்று, இறந்தவர் உடலை பார்வையிட்டு விசாரணை நடத்தினர். இதில் இறந்து கிடந்தவர் விஜயகுமார் என்பது தெரியவந்தது. இதையடுத்து விஜயகுமாரின் உடலை கைப்பற்றி பிரேத பரிசோதனைக்காக பெரம்பலூர் அரசு மருத்துவமனைக்கு கொண்டு சென்றனர். மேலும் இது குறித்து மங்களமேடு போலீஸ் இன்ஸ்பெக்டர் கலா வழக்குப்பதிவு செய்து, விஜயகுமார் தற்கொலை செய்து கொண்டாரா? அல்லது யாரேனும் அவரை கொலை செய்தனரா? என்பது உள்ளிட்ட கோணங்களில் விசாரணை நடத்தி வருகின்றனர்.