மண்டபத்தில் உயிருடன் கரை ஒதுங்கிய ஆமை பாதுகாப்பாக கடலில் விடப்பட்டது

பனைக்குளம்,

ராமநாதபுரம் மாவட்டம் மன்னார் வளைகுடா மற்றும் பாக்ஜலசந்தி கடல்பகுதியில் ஏராளமான ஆமைகள் வாழ்ந்து வருகின்றன. இந்த நிலையில் மண்டபம் தெற்கு கடற்கரை பகுதியில் நேற்று உயிருடன் ஆமை ஒன்று கரை ஒதுங்கி இருப்பதாக வனத்துறையினருக்கு தகவல் கிடைத்தது.

மண்டபம் வனச்சரகர் வெங்கடேஷ் தலைமையிலான வனத்துறை அதிகாரிகள் மற்றும் வேட்டை தடுப்பு காவலர்கள் அங்கு விரைந்து சென்றனர். கரை ஒதுங்கி கிடந்த ஆமையை பார்வையிட்டபோது சுமார் 3 அடி நீளமும் 100 கிலோ எடை கொண்டதாக இருப்பது தெரியவந்தது. உயிருக்கு போராடிக்கொண்டிருந்த அந்த ஆமையை வனத்துறையினர் ஆழமான கடல் பகுதிக்கு கொண்டு சென்று விட்டனர். தொடர்ந்து அந்த ஆமை ஆழ்கடல் பகுதியை நோக்கி வேகமாக நீந்தி சென்றது.

இதேபோல் மண்டபம் யூனியன் பனைக்குளம் பகுதியில் மீனவர்கள் வலையில் உயிருடன் ஆமை ஒன்று சிக்கியுள்ளது. இதுபற்றி தகவல் அறிந்ததும் விரைந்து சென்ற ராமநாதபுரம் வனச்சரகர் சதீஷ் உள்ளிட்ட வனத்துறையினர் உயிருடன் இருந்த அந்த ஆமையை மீனவர்கள் உதவியுடன் கடலுக்குள் கொண்டு சென்று விட்டனர்.

இதுபற்றி வனத்துறை அதிகாரிகள் கூறியதாவது:- வருகிற டிசம்பர் மாதம் முதல் ஏப்ரல் மாதம் வரை ஆமைகள் முட்டையிடும் சீசன். இந்த சீசன் தொடங்க இன்னும் ஒரு சில மாதங்களே உள்ளதால் தற்போது கரையோரம் உள்ள கடல் பகுதியில் அதிக ஆமைகள் வர வாய்ப்பு உள்ளது. அதனால் மீன் பிடிக்க செல்லும் மீனவர்கள் கரையோர பகுதியில் ஆமைகளை பார்த்தால் உடனடியாக அந்த ஆமையை மீட்டு கடலில்விட முன்வர வேண்டும். இவ்வாறு அவர்கள் கூறினர்.