கள்ளக்குறிச்சி மாவட்ட கலெக்டர் அலுவலக புதிய கட்டிடம் கட்டுவதற்கான பூமி பூஜை காணொலி காட்சி மூலம் முதல்-அமைச்சர் வருகிற 19-ந் தேதி தொடங்கி வைக்கிறார்

கள்ளக்குறிச்சி,

விழுப்புரம் மாவட்டத்தை இரண்டாக பிரித்து கள்ளக்குறிச்சியை தலைமையிடமாக கொண்டு புதிய மாவட்டத்தை கடந்த 26-11-2019 அன்று கள்ளக்குறிச்சியில் நடந்த விழாவில் முதல்-அமைச்சர் எடப்பாடி பழனிசாமி தொடங்கி வைத்தார். இதையடுத்து கள்ளக்குறிச்சி மாவட்ட கலெக்டர் அலுவலகம் தற்காலிகமாக ஒழுங்குமுறை விற்பனை கூட வளாகத்தில் உள்ள ஒரு பகுதியில் இயங்கி வருகிறது.

கலெக்டர் அலுவலகத்துக்கு புதிய கட்டிடம் கட்டுவதற்கு வீரசோழபுரம் கிராம எல்லையில் அரசுக்கு சொந்தமான 40.18 ஏக்கர் பரப்பளவில் உள்ள இடத்தை தேர்வு செய்து அந்த இடத்திற்கான வரைப்படம் அரசுக்கு சமர்ப்பிக்கப்பட்டது. இதை ஏற்று புதிய கலெக்டர் அலுவலகம் கட்டுவதற்கு தமிழக அரசு ரூ.104 கோடி நிதி ஒதுக்கீடு செய்தது.

இதையடுத்து புதிய கலெக்டர் அலுவலகம் கட்டுவதற்கான பூர்வாங்க பணிகள் தொடங்கியது. 3 லட்சம் சதுர அடி பரப்பளவில் தரைதளம் உள்பட எட்டு மாடிகளுடன் கலெக்டர் அலுவலகம் கட்டப்பட உள்ளது. இதில் வருவாய்த்துறை, பிற்படுத்தப்பட்டோர், சத்துணவு, குழந்தைகள் வளர்ச்சி திட்டம் என மொத்தம் 66 மாவட்ட அலுவலகங்கள் செயல்பட உள்ளன.

மேலும் இந்த வளாகத்தில் கலெக்டர் குடியிருப்பு, போலீஸ் சூப்பிரண்டு அலுவலகம் மற்றும் குடியிருப்பு, கவாத்து பயிற்சி மைதானம், விளையாட்டு மைதானம் ஆகியவையும் அமைய உள்ளது.

புதிய கலெக்டர் அலுவலகம் கட்டுவதற்கான பூமி பூஜை வருகிற 19-ந்தேதி நடைபெற உள்ளது. இதை சென்னையில்இருந்து முதல்-அமைச்சர் எடப்பாடி. பழனிசாமி காணொலி காட்சி மூலம் அடிக்கல் நாட்டி பூமி பூஜையை தொடங்கி வைக்கிறார்.

இதையடுத்து கட்டிடம் கட்டப்பட உள்ள இடத்தில் வளர்ந்து நின்ற செடி, கொடிகளை அகற்றி தரைப்பகுதியை சமன் செய்து பாதை அமைக்கும் பணி மும்முரமாக நடைபெற்று வருகிறது. முன்னேற்பாடு பணிகளை கலெக்டர் கிரண்குராலா நேரில் சென்று பார்வையிட்டு ஆய்வு செய்தார். அப்போது விழா மேடை மற்றும் பந்தல் அமைக்கும் இடம், முகப்பு அமைக்கப்பட உள்ள இடம், பாதை அமைத்தல் சம்மந்தமாக அதிகாரிகளிடம் அவர் ஆலோசனை நடத்தினார். மாவட்ட வருவாய் அலுவலர் சங்கீதா, பொதுப்பணித்துறை விழுப்புரம் செயற்பொறியாளர் வெங்கடாசலம், கள்ளக்குறிச்சி உதவி செயற்பொறியாளர் கவுதமன், உதவி பொறியாளர்கள் பாலாஜி, யாசர்அராபத் ஆகியோர் உடன் இருந்தனர்.