ஈரோடு மாவட்டத்தில் 80 பேருக்கு கொரோனா ஒருவர் பலி

ஈரோடு, 

ஈரோடு மாவட்டத்தில் தற்போது கொரோனாவின் தாக்கம் குறைய தொடங்கி உள்ளது. கடந்த சில வாரங்களுக்கு முன்பு தினந்தோறும் 100 முதல் 180 பேர்வரை கொரோனாவால் பாதிக்கப்பட்டு வந்தனர். தற்போது கொரோனா பாதிப்பு 80 முதல் 130 பேர் வரை உள்ளது.

இதற்கிடையில் ஈரோடு மாநகர் பகுதியை சேர்ந்த 64 வயது முதியவர் ஒருவர் காய்ச்சல் மற்றும் சளி தொல்லை காரணமாக ஈரோட்டில் உள்ள ஒரு தனியார் மருத்துவமனையில் சிகிச்சைக்காக அனுமதிக்கப்பட்டார். அங்கு அவருக்கு பரிசோதனை செய்தபோது கொரோனா தொற்று உறுதி செய்யப்பட்டது. இதைத்தொடர்ந்து டாக்டர்கள் அவருக்கு சிகிச்சை அளித்து வந்தனர். இந்த நிலையில் சிகிச்சை பலனின்றி நேற்று முன்தினம் முதியவர் இறந்தார். இதனால் கொரோனாவால் இறந்தவர்களின் எண்ணிக்கை 116 ஆக உயர்ந்தது.

80 பேருக்கு தொற்று

மேலும் நேற்று ஒரே நாளில் மாவட்டம் முழுவதும் 80 பேருக்கு கொரோனா தொற்று உறுதி செய்யப்பட்டு சிகிச்சைக்காக பல்வேறு மருத்துவமனைகளில் அனுமதிக்கப்பட்டு உள்ளனர். இதனால் மாவட்டத்தில் கொரோனாவால் பாதிக்கப்பட்டவர்களின் எண்ணிக்கை 9 ஆயிரத்து 459 ஆக உயர்ந்து உள்ளது.

அதேநேரத்தில் நேற்று மாவட்டம் முழுவதும் பல்வேறு மருத்துவமனைகளில் சிகிச்சை பெற்று வந்த 111 பேர் குணம் அடைந்து வீடுகளுக்கு சென்றனர். இதுவரை மொத்தம் 8 ஆயிரத்து 476 பேர் கொரோனாவில் இருந்து குணம் அடைந்துள்ளனர். தற்போது மாவட்டம் முழுவதும் 867 பேர் கொரோனாவுக்காக சிகிச்சை பெற்று வருகிறார்கள்.