கள்ளக்குறிச்சி மாவட்டத்தில் 6 போலீஸ் நிலையங்களில் பேரிடர் மீட்பு குழுவினர் தயார் நிலையில் உள்ளனர்

கள்ளக்குறிச்சி, 

கள்ளக்குறிச்சி மாவட்டத்தில் நிவர் புயலை எதிர்கொள்ளும் வகையில் மாவட்ட போலீஸ் சூப்பிரண்டு ஜியாவுல்ஹக் உத்தரவுவின்படி கள்ளக்குறிச்சி, சின்னசேலம், கல்வராயன்மலை, உளுந்துார்பேட்டை, சங்கராபுரம் மற்றும் திருக்கோவிலுார் ஆகிய 6 போலீஸ் நிலையங்களில் பேரிடர் மீட்பு படை குழுவினர் தயார் நிலையில் உள்ளனர். குறிப்பிட்ட போலீஸ் நிலையங்களில் உள்ள சப்-இன்ஸ்பெக்டர் தலைமையில் அமைக்கப்பட்டுள்ள மீட்புக் குழுவில் பேரிடர் மேலாண்மை மீட்பு தொடர்பாக பயிற்சி பெற்ற 10 போலீசார் நியமிக்கப்பட்டுள்ளனர். இவர்களுக்கு பிரதிபலிப்பு உடை, கடப்பாரை, மண்வெட்டி, கொடுவாள், கயிறு, டார்ச் லைட் ஆகிய உபகரணங்கள் மற்றும் மரம் அறுவை , பொக்லைன் இயந்திரம் ஆகியவை வழங்கப்பட்டுள்ளன.

வெள்ள பாதிப்பு ஏற்படும் பகுதிகளில் இக்குழுவினர் தயார் நிலையில் இருப்பார்கள். குறிப்பாக கனமழையால் பாதிக்கப்படும் கிராமங்களில் பொதுமக்களை மீட்டு பத்திரமான இடத்துக்கு அழைத்து செல்வது, காற்றின் வேகத்தால் மரம், மின்கம்பம் விழுந்து வீடு சேதமடைந்தால் அங்கு வசிப்பவர்களை மீட்பது, சாலையில் விழும் மரங்களை உடனடியாக அப்புறப்படுத்தி போக்குவரத்தை சீரமைப்பது உள்ளிட்ட பணிகளை மேற்கொள்வார்கள் என போலீஸ் சூப்பிரண்டு ஜியாவுல்ஹக் தெரிவித்துள்ளார்.