கொரோனா தடுப்பு விதிமுறைகளை கடைபிடிக்காத திருமண மண்டப உரிமையாளர்கள் மீது நடவடிக்கை - கலெக்டர் மெகராஜ் எச்சரிக்கை

நாமக்கல்,

நாமக்கல் மாவட்ட கலெக்டர் அலுவலக கூட்டரங்கில் கொரோனா தொற்று தடுப்பு நடவடிக்கைகளில் திருமண மண்டப உரிமையாளர்களுக்கான அரசின் வழிகாட்டி நெறிமுறைகள் குறித்த ஆலோசனை கூட்டம் நடந்தது. கூட்டத்துக்கு மாவட்ட போலீஸ் சூப்பிரண்டு சக்தி கணேசன் முன்னிலை வகித்தார். மாவட்ட கலெக்டர் மெகராஜ் தலைமை தாங்கி பேசும்போது கூறியதாவது:-

நாமக்கல் மாவட்டத்தில் உள்ள மண்டபங்களில் திருமணம் மற்றும் இதர நிகழ்ச்சிகள் நடைபெறும்போது கொரோனா தொற்று பரவாமல் தடுக்க அரசு அறிவுறுத்தி உள்ள முன் எச்சரிக்கை விதிமுறைகளை பின்பற்ற வேண்டும். நிகழ்ச்சியில் பங்கேற்கும் அனைவரும் சமூக இடைவெளியை கடைபிடிப்பதுடன், முககவசம் அணிந்திருக்க வேண்டும். மண்டபத்தின் முன்புறம் வரவேற்பு அளிக்கும் இடத்தில் முககவசம் மற்றும் கிருமிநாசினி வழங்க நடவடிக்கைகள் மேற்கொள்ள வேண்டும்.

திருமண மண்டபத்தின் முன்புறம் கை கழுவ ஏதுவாக, தண்ணீர் மற்றும் சோப்பு ஆகியவற்றை வைத்திருக்க வேண்டும். மண்டப கொள்ளளவில் 50 சதவீத நபர்களை மட்டுமே அனுமதிக்க வேண்டும்். பெரிய திருமண மண்டபமாக இருந்தாலும் அதிகபட்சமாக 200 நபர்களுக்கு மிகாமல் இருக்க வேண்டும்.

ஒரு நிகழ்ச்சி நடைபெற்று முடிந்தவுடன் அனைத்து இடங்களையும் கிருமிநாசினி தெளித்தும், உரிய காற்றோட்ட அமைப்பை ஏற்படுத்தியும் தூய்மைப்படுத்த நடவடிக்கைகள் மேற்கொள்ள வேண்டும். திருமண மண்டபங்கள், சமுதாய கூடங்கள் மற்றும் மக்கள் கூடம் இடங்களின் முக்கிய பகுதிகளில் முககவசம் அணிதல், கிருமிநாசினி பயன்படுத்துதல் மற்றும் கைகளை தூய்மைப்படுத்துதல் தொடர்பாக தகவல் பலகை வைக்க உரிய அலுவலர்கள் நடவடிக்கைகள் மேற்கொள்ள வேண்டும்.

தற்போது பருவமழை அதிகரித்து வரும் நிலையில் வேறு நோய்களும் பரவாமல் தடுக்க உரிய முன் எச்சரிக்கை நடவடிக்கைகள் மேற்கொள்ள வேண்டும். கொரோனா நோய் தொற்று பரவாமல் தடுக்க அரசு விதித்துள்ள முன்னெச்சரிக்கை நடவடிக்கைகள் மற்றும் விதிமுறைகளை கடைபிடிக்காத திருமண மண்டப உரிமையாளர்கள் மீது தக்க நடவடிக்கைகள் மேற்கொள்ளப்படும். இவ்வாறு அவர் கூறினார்.

இதில் மாவட்ட வருவாய் அலுவலர் துர்காமூர்த்தி, திருச்செங்கோடு உதவி கலெக்டர் மணிராஜ் உள்பட அரசுத்துறை அலுவலர்கள் மற்றும் திருமண மண்டப உரிமையாளர்கள் கலந்து கொண்டனர்.