காதல் தோல்வி: என்ஜினீயர் கழுத்தை அறுத்து தற்கொலை

கோவை, 

கோவை ஒண்டிப்புதூர் காமாட்சி புரத்தைச் சேர்ந்தவர் ராஜூ.இவருடைய மகன் கார்த்திகேயன் (வயது 27) என்ஜினீயரிங் படித்து முடித்து விட்டு ஒத்தக்கால் மண்டபத்தில் உள்ள ஒரு தனியார் நிறுவனத்தில் என்ஜினீயராக வேலை பார்த்து வந்தார்.

இவர் ஒரு பெண்ணை காதலித்து வந்துள்ளார். அதில் தோல்வி அடைந்ததாக கூறப்படுகிறது. இதனால் மன அழுத்தத்துடன் காணப்பட்ட கார்த்திகேயன் நேற்று அதிகாலை 4 மணிக்கு அவரது வீட்டில் வைத்து பிளேடால் தனது கழுத்தை அறுத்துள்ளார். பின்னர் ஸ்குரு டிரைவரை எடுத்து வாய்க்குள் குத்தியதாக தெரிகிறது.இந்த நிலையில் அவர் ரத்தவெள்ளத்தில் வீட்டைவிட்டு வெளியே வந்து விழுந்தார். சிறிது நேரத்தில் பிணமானார். மகன் ரத்தவெள்ளத்தில் இறந்து கிடப்பதை பார்த்து பெற்றோர் கதறி துடித்தனர். இந்த தற்கொலை குறித்து அவருடைய தந்தை ராஜூ சிங்காநல்லூர் போலீசில் புகார் செய்தார். போலீசார் உடலை கைப்பற்றி பிரேத பரிசோதனைக்காக கோவை அரசு ஆஸ்பத்திரிக்கு அனுப்பி வைத்தனர். காதல் தோல்வியால் என்ஜினீயர் கழுத்தை அறுத்து தற்கொலை செய்து கொண்டது சிங்காநல்லூரில் பரபரப்பை ஏற்படுத்தி உள்ளது.