இணையதளம் மூலம் வழக்குகளை கண்டுபிடிக்க சிறப்பாக பணியாற்றிய பெண் போலீசுக்கு பாராட்டு

தூத்துக்குடி,

தமிழகத்தில் உள்ள அனைத்து போலீஸ் நிலையங்களிலும் குற்றம் மற்றும் குற்றவாளிகளை கண்காணிக்கும் சி.சி.டி.என்.எஸ். என்ற இணையதள வசதி செய்யப்பட்டு உள்ளது. இதன் மூலம் குற்ற வழக்குகளில் ஈடுபட்டவர்கள், காணாமல் போனவர்கள், திருட்டு போன வாகனங்கள் போன்றவற்றை கண்டுபிடிப்பதற்கு இந்த இணையதளம் ஏதுவாக உள்ளது.

இந்த இணையதள பயன்பாடு குறித்து டெல்லியில் உள்ள தேசிய குற்ற ஆவண காப்பகம் தமிழகத்தில் உள்ள அனைத்து போலீஸ் நிலையங்களிலும் ஆய்வு நடத்தியது. இந்த ஆய்வில் மேற்படி சி.சி.டி.என்.எஸ். இணையதளத்தை அதிக அளவில் பயன்படுத்தி குற்ற வழக்குகளில் ஈடுபட்டவர்களை கண்டுபிடித்தல், திருட்டு வாகனங்களை கண்டுபிடித்தல், காணாமல் போனவர்களை கண்டுபிடித்தல் உட்பட பல்வேறு வழக்குகளில் சிறப்பாக பணியாற்றியதற்காக தமிழக போலீஸ் துறையில் 3 பேர் தேர்வு செய்யப்பட்டு உள்ளனர். இதில் தூத்துக்குடி தாளமுத்துநகர் போலீஸ் நிலையத்தில் பணியாற்றி வரும் பெண் போலீஸ் ஜோசி என்பவரும் ஒருவராக தேர்வு செய்யப்பட்டு உள்ளார்.

இதைத் தொடர்ந்து பெண் போலீஸ் ஜோசியை மாவட்ட போலீஸ் சூப்பிரண்டு ஜெயக்குமார் பரிசு வழங்கி பாராட்டினார். நிகழ்ச்சியில் தூத்துக்குடி துணை போலீஸ் சூப்பிரண்டு கணேஷ், தாளமுத்துநகர் போலீஸ் இன்ஸ்பெக்டர் ஜெயந்தி மற்றும் போலீசார் உடன் இருந்தனர்.