செல்போன் டவர் அமைக்க ஒப்பந்தம் செய்வதாக பரமக்குடி பெண்ணிடம் ரூ.1¼ லட்சம் மோசடி

ராமநாதபுரம் மாவட்டம் பரமக்குடி சுந்தர்ராஜபட்டினம் தெரு பகுதியை சேர்ந்தவர் ஜமால் மைதீன் மனைவி ரகுமத்துநிஷா (வயது35) . இவரின் செல்போன் எண்ணிற்கு செல்போன் அமைக்க இடம் தேவை என்றும் முன்பணம் ரூ.40 லட்சம், மாத வாடகை ரூ.35 ஆயிரம் என்றும் 10 வருட ஒப்பந்த காலம் என்றும் குறுந்தகவல் கடந்த 18-ந் தேதி வந்துள்ளது.

குடும்ப வறுமை காரணமாக அவதிப்பட்டு வந்த ரகுமத்நிஷா தங்களிடம் உள்ள நிலத்தினை செல்போன் டவர் அமைக்க வழங்கலாம் என எண்ணினார். இதன்படி அவருக்கு வந்த குறுந்தகவலில் குறிப்பிடப்பட்ட எண்ணில் தொடர்பு கொண்டு பேசியபோது நிலத்தின் விவரங்களை கேட்டறிந்தவர்கள் அதற்கான ஒப்பந்தம் செய்வதற்கு ரூ.4 ஆயிரத்து 500 முன்பணம் கட்டணம் செலுத்த வேண்டும் என வங்கி கணக்கு வழங்கி உள்ளனர். இந்த தொகையை செலுத்திய நிலையில் மேலும் 2 தவணைகளில் பணம் கேட்டதால் மொத்தம் ரூ.1 லட்சத்து 27 ஆயிரம் பணம் 3 வங்கி கணக்குகளில் ரகுமத் நிஷா செலுத்தி உள்ளார்.

இதன்பின்னரும் செல்போன் டவர் அமைக்கவோ, முன்பணம் வழங்கவோ முன்வராத நிலையில் அந்த எண்களை தொடர்பு கொண்டபோது தான் ஏமாற்றப்பட்டதை உணர்ந்தார்.

இதுகுறித்து ரகுமத்துநிஷா மாவட்ட போலீஸ் சூப்பிரண்டு கார்த்திக்கிடம் புகார் செய்தார். அவரின் உத்தரவின்பேரில் மாவட்ட குற்றப்பிரிவு போலீசார் வழக்குப்பதிவு செய்து மோசடி நபர்களை தேடிவருகின்றனர்.

ராமநாதபுரம் மாவட்டத்தில் கடந்த சில நாட்களாக மோசடி நபர்கள் செல்போன் டவர் அமைக்க இடம் வழங்குமாறு கூறி கடிதம் வாயிலாகவும், செல்போன் குறுந்தகவல் மூலமாகவும் நூதன பண மோசடியில் ஈடுபட்டு வருகின்றனர் என்பது குறிப்பிடத்தக்கது.