புத்தாண்டையொட்டி ஒகேனக்கல்லில் சுற்றுலா பயணிகள் குவிந்தனர் - மேட்டூர், ஏற்காட்டில் பூங்காக்கள் வெறிச்சோடின

பென்னாகரம்,

தர்மபுரி மாவட்டம் ஒகேனக்கல் சுற்றுலா தலமாக விளங்கி வருகிறது. கர்நாடகா, ஆந்திரா, கேரளா மற்றும் பல்வேறு மாநிலங்களில் இருந்தும் தமிழகத்தின் பல்வேறு மாவட்டங்களில் இருந்தும் தினமும் ஏராளமான சுற்றுலா பயணிகள் வந்து செல்வார்கள். சுற்றுலா பயணிகள் அருவியில் குளித்தும், பரிசலில் சென்றும் மகிழ்வார்கள். தற்போது ஒகேனக்கல்லுக்கு நீர்வரத்து குறைந்துள்ளது. இதனால் சுற்றுலா பயணிகள் வருகை நாளுக்கு நாள் அதிகரித்து காணப்படுகிறது.

இந்த நிலையில் நேற்று ஆங்கில புத்தாண்டு பிறப்பு மற்றும் விடுமுறை என்பதால் ஏராளமான சுற்றுலா பயணிகள் ஒகேனக்கல்லில் குவிந்தனர். அவர்கள் எண்ணெய் மசாஜ் செய்து கொண்டு மெயின் அருவி மற்றும் காவிரி கரையோரம் குளித்து மகிழ்ந்தனர். பின்னர் சுற்றுலா பயணிகள் பாதுகாப்பு உடை அணிந்து கொத்திகல் பரிசல் துறையில் இருந்து மெயின் அருவி மணல் திட்டு, ஐந்தருவி வரை காவிரி ஆற்றில் பரிசலில் உற்சாகமாக சென்று மகிழ்ந்தனர்.

நேற்று காலை முதல் சுற்றுலா பயணிகள் மீன் அருங்காட்சியகம், முதலைப்பண்ணை, சிறுவர் பூங்கா உள்ளிட்ட பகுதிகளில் சுற்றி பார்த்தனர். தொங்கும் பாலத்திலும் சுற்றுலா பயணிகள் அதிகளவில் குவிந்தனர். இதனால் அங்கு கூட்டம் அலைமோதியது.சுற்றுலா பயணிகள் வருகை அதிகரிப்பால் ஒகேனக்கல் பஸ் நிலையம், நடைபாதை, அஞ்செட்டி சாலை உள்ளிட்ட பகுதிகளில் கூட்டம் அலைமோதியது. இதனால் கடைகள், ஓட்டல்களில் விற்பனை படுஜோராக நடைபெற்றது. கூட்டம் அதிகமாக இருந்ததால் அசம்பாவித சம்பவங்கள் நடக்காமல் இருக்க போலீசார் ஊட்டமலை, ஆலம்பாடி, மணல்திட்டு, பரிசல் துறை உள்ளிட்ட பகுதிகளில் தீவிர பாதுகாப்பு பணியில் ஈடுபட்டு கண்காணித்தனர்.

புத்தாண்டு விடுமுறையை முன்னிட்டு சேலம் மாவட்டம் மேட்டூர் அணை பூங்காவிற்கு சுற்றுலா பயணிகள் வருகை அதிகமாக இருக்கும். இதை கருத்தில் கொண்டு பூங்காவுக்கு வருவதற்கு சுற்றுலா பயணிகளுக்கு தடை விதிக்கப்பட்டது. மேலும் நேற்றும், இன்றும் பூங்கா மூடப்படும் என்று அறிவிக்கப்பட்டது. இதனால் நேற்று மேட்டூர் பகுதி சுற்றுலா பயணிகள் இன்றி வெறிச்சோடி காணப்பட்டது.

இதே போல ஏழைகளின் ஊட்டி என்றழைக்கப்படும் ஏற்காட்டுக்கு நேற்று சுற்றுலா பயணிகள் செல்ல தடை விதிக்கப்பட்டு இருந்தது. இதன் காரணமாக நேற்று ஏற்காட்டுக்கு கார்கள் மற்றும் இரு சக்கர வாகனங்களில் சென்ற சுற்றுலா பயணிகள், அடிவாரம் பகுதியில் தடுத்து நிறுத்தப்பட்டு, திருப்பி அனுப்பப்பட்டனர். இதனால் ஏற்காட்டில் உள்ள அண்ணா பூங்கா, படகு இல்லம் உள்பட அனைத்து சுற்றுலா தலங்களும் நேற்று வெறிச்சோடி காணப்பட்டன.