வசாயில் பரிதாபம்: மோட்டார் சைக்கிள் மோதி இளம்பெண் பலி வாலிபர் கைது

வசாய், 

பால்கர் மாவட்டம் வசாய் கிழக்கு மோரர்பாக் பகுதியை சேர்ந்த இளம்பெண் அல்பியா ரிஸ்வி (வயது18) . இவர் நிறுவனம் ஒன்றில் ஊழியராக பணிபுரிந்து வந்தார். மாதம் ஒரு தடவை வீட்டிற்கு வருவது வழக்கம். புத்தாண்டு கொண்டாட வீட்டிற்கு வந்திருந்தார். விடுமுறை முடிந்து நேற்றுமுன்தினம் காலை 10.30 மணி அளவில் வேலைக்கு செல்ல வீட்டில் இருந்து புறப்பட்டார்.

சாத்திவிலி நாக்கா ரேஞ்ச் அலுவலகம் அருகே உள்ள சாலையை கடக்க முயன்றார். அப்போது வாலிபர் ஒருவர் வேகமாக ஓட்டி வந்த மோட்டார் சைக்கிள் ஒன்று அல்பியா ரிஸ்வி மீது மோதியது. இதனால் அவர் தூக்கி வீசப்பட்டதில் தலையில் பலத்த காயமடைந்து உயிருக்கு போராடினார்.

இதனை கண்ட அப்பகுதியை சேர்ந்தவர்கள் அவரை மீட்டு அருகில் உள்ள ஆஸ்பத்திரிக்கு கொண்டு சென்றனர். அங்கு பரிசோதனை நடத்திய டாக்டர் வரும் வழியிலேயே அவர் உயிரிழந்ததாக தெரிவித்தார். இது பற்றி தகவல் அறிந்த வாலிவ் போலீசார் சம்பவ இடத்திற்கு சென்று உடலை மீட்டு பிரேத பரிசோதனைக்கு அனுப்பி வைத்தனர்.

சம்பவம் குறித்து போலீசார் வழக்கு பதிவு செய்து விபத்து ஏற்படுத்திய சித்தாந்த் சேட்கே (18) என்ற வாலிபரை கைது செய்தனர்.