திருமருகல் அருகே வி‌‌ஷமருந்து தெளிக்கப்பட்டதால் 1½ ஏக்கர் நெற்பயிர்கள் கருகி நாசம் போலீசார் விசாரணை

திட்டச்சேரி,

நாகை மாவட்டம் திருமருகல் ஒன்றியம் மருங்கூரை அடுத்த எரவாஞ்சேரி பிள்ளையார் கோவில் தெருவை சேர்ந்தவர் ரவிச்சந்திரன். விவசாயியான இவருக்கு உத்தூர் கிராமத்தில் 1½ ஏக்கர் நிலம் உள்ளது. இந்த நிலத்தில் அவர், நெற்பயிர் சாகுபடி செய்திருந்தார். இந்த நிலையில் கடந்த 27-ந்தேதி இவரது வயலில் நெற்பயிர்கள் மீது வி‌‌ஷமருந்தை யாரோ தெளித்து சென்றுள்ளனர். இதனால் 1½ ஏக்கர் நெற்பயிர்களும் கருகி நாசமடைந்தன.

இதுகுறித்து ரவிச்சந்திரன் மாவட்ட போலீஸ் சூப்பிரண்டு ஓம்பிரகா‌‌ஷ் மீனாவிடம் புகார் கொடுத்தார். அந்த புகாரில் உத்தூர் தெற்கு தெருவை சேர்ந்த ஒருவர் தனது வயலில் வி‌‌ஷ மருந்து தெளித்ததால் நெற்பயிர்கள் கருகி நாசமடைந்தன.

போலீசார் எச்சரித்து அனுப்பினர்

இதே நபர் இதேபோல கடந்த ஒரு ஆண்டுக்கு முன்பும் நெற்பயிர்களுக்கு வி‌‌ஷமருந்து தெளித்தார். இதனால் அப்போது திட்டச்சேரி போலீசில் புகார் கொடுத்தேன். அதன் பேரில் போலீசார் அவர் மீது வழக்குப்பதிவு செய்து அவரிடம் எழுதி வாங்கி கொண்டு எச்சரித்து அனுப்பினர். ஆனால் அவர் கடந்த சில நாட்களுக்கு முன்பு மீண்டும் எனது வயலில் நெற்பயிர்களுக்கு வி‌‌ஷமருந்து தெளித்துள்ளார். இதுதொடர்பாக 2-வது முறையாக திட்டச்சேரி போலீசில் புகார் கொடுத்துள்ளேன். எனவே அவர் மீது நடவடிக்கை எடுக்க வேண்டும் என தெரிவித்திருந்தார்.

இந்த புகார் மீது நடவடிக்கை எடுக்க வேண்டும் என திட்டச்சேரி போலீசாருக்கு, போலீஸ் சூப்பிரண்டு உத்தரவிட்டார். அதன் பேரில் போலீசார் விசாரணை நடத்தி வருகின்றனர்.