இலங்கை கடற்படை கப்பல் மோதியதில் விசைப்படகு மூழ்கியது; 4 மீனவர்கள் மாயம் - தேடும் பணியை துரிதப்படுத்த கோரி மறியல்

கோட்டைப்பட்டினம்,

புதுக்கோட்டை மாவட்டம் கோட்டைப்பட்டினம் பகுதியில் 750-க்கும் மேற்பட்ட விசைப்படகுகள் உள்ளன. இங்கு இருந்து தினந்தோறும் 2,500-க்கும் மேற்பட்ட மீனவர்கள் கடலுக்குள் சென்று மீன்பிடிப்பது வழக்கம். இந்நிலையில் நேற்று முன்தினம் கோட்டைப்பட்டினம் பகுதியில் இருந்து ராமேசுவரம் பகுதியை சேர்ந்த ஆரேக்கிய சேசு (வயது 50) என்பவருக்கு சொந்தமான விசைப்படகில் ராமேசுவரம் பகுதியை சேர்ந்த மெசியா (30), நாகராஜ் (52), சாம் (28), செந்தில்குமார் (32) ஆகிய 4 மீனவர்கள் கடலுக்குள் மீன்பிடிக்க சென்றனர்.

இவர்கள் நேற்று முன்தினம் இரவு நடுக்கடலில் மீன்பிடித்துக் கொண்டிருக்கும் போது, இலங்கை கடற்படையினரின் ரோந்து கப்பல் மீனவர்களின் படகின் மீது மோதி விட்டு அங்கிருந்து சென்று விட்டது என்று கூறப்படுகிறது. இதனால் படகின் பின்புறம் சேதம் அடைந்து தண்ணீர் புகுந்தது. இதனை அறிந்த மீனவர்கள் இது குறித்து வாக்கி டாக்கி மூலம் மற்ற மீனவர்களுக்கு தகவல் கொடுத்துள்ளனர். ஆனால் அப்பகுதியில் இலங்கை கடற்படையினர் இருந்ததால் அப்பகுதிக்குள் மற்ற மீனவர்கள் செல்லமுடியாத சூழல் ஏற்பட்டது.

இதனிடையே அந்த மீனவர்களையும், விசைப்படகையும் காணவில்லை. அந்த படகு கடலில் மூழ்கியதாக சந்தேகிக்கப்படுகிறது. அதில் சென்ற மீனவர்களின் கதி என்ன? என்ற விவரம் தெரியவில்லை. இதற்கிடையே கரை திரும்பிய மற்ற மீனவர்கள் இதுகுறித்து விசைப்படகு சங்கத்துக்கு தகவல் தெரிவித்தனர். அதன் அடிப்படையில் மீன்வளத்துறை மற்றும் கடலோர காவல் குழுமத்திற்கு தகவல் தெரிவிக்கப்பட்டது.

பின்னர் சம்பவ இடத்திற்கு வந்த அதிகாரிகள் மீனவர்களிடம் நடந்த சம்பவத்தை கேட்டறிந்தனர். மீனவர்கள் சார்பாக அந்த விசைப்படகில் சென்று மாயமான 4 மீனவர்களை தேடும் பணியை துரிதப்படுத்த வேண்டும் என்று தெரிவித்தனர்.அதன் அடிப்படையில் 3 விசைப்படகில் 12 மீனவர்கள் காணாமல் போன மீனவர்களை தேடி கடலுக்குள் சென்றனர். ஆனால் தேடும் பணியில் தொய்வு ஏற்பட்டது.

எனவே மீனவர்களை தேடும் பணியை துரிதப்படுத்த வேண்டும் என்று கூறி மீனவர்கள் கோட்டைப்பட்டினம் கிழக்கு கடற்கரை சாலையில் அமர்ந்து மறியல் போராட்டத்தில் ஈடுபட்டனர்.தகவல் அறிந்து சம்பவ இடத்திற்கு மீன்வளத்துறை உதவி இயக்குனர் குமரேசன் மற்றும் போலீசார், வருவாய்துறையினர் சம்பவ இடத்துக்கு விரைந்து வந்து மறியலில் ஈடுப்பட்ட மீனவர்களிடம் பேச்சுவார்த்தை நடத்தினர். அப்போது அவர்களிடம் மீனவர்களை தேடும் பணி துரிதப்படுத்தப்பட்டுள்ளது. மண்டபம் கடற்படைக்கு சொந்தமான அதிநவீன படகு மூலம் தேடுதல் பணியை ெதாடங்கியுள்ளனர். ஹெலிகாப்டர் மூலமாகவும் தேடும் பணி நடைபெறுகிறது. அதனால் மீனவர்களை விரைவாக கண்டு்பிடித்து விடுவோம் என்று உறுதியளித்தனர்.

இதனையடுத்து அவர்கள் போராட்டத்தை கைவிட்டனர். இதற்கிடையே மீனவர்களை கண்டுபிடிக்கும் வரை மீனவர்கள் கடலுக்குள் செல்லமாட்டார்கள் என்று மீனவ சங்கத்தினர் அறிவித்துள்ளனர்.