<
வெள்ளகோவில் அருகே உள்ள வட்டமலைக்கரை ஓடை அணையில் தேசியக்கொடியுடன் திரண்ட பொதுமக்களால் பரபரப்பு அமராவதி ஆற்றில் இருந்து தண்ணீர் திறக்க கோரிக்கை
வெள்ளகோவில் அருகே உள்ள வட்டமலை கரை ஓடை அணைக்கு அமராவதி ஆற்றில் இருந்து தண்ணீர் திறக்க கோரி பொதுமக்கள் தேசியக் கொடியுடன் அணைப்பகுதியில் திரண்டதால் பரபரப்பு ஏற்பட்டது.
வெள்ளகோவில்:
வெள்ளகோவில் அருகே உள்ள வட்டமலை கரை ஓடை அணைக்கு அமராவதி ஆற்றில் இருந்து தண்ணீர் திறக்க கோரி பொதுமக்கள் தேசியக் கொடியுடன் அணைப்பகுதியில் திரண்டதால் பரபரப்பு ஏற்பட்டது.
திருப்பூர் மாவட்டம் வெள்ளகோவில் அருகே உள்ள உத்தமபாளையத்தில் வட்டமலைக்கரை ஓடை அணை உள்ளது. இந்த அணை 1980-ம் ஆண்டு பரம்பிக்குளம்-ஆழியாறு பாசன விரிவாக்கத் திட்டத்தின் கீழ் ரூ.2 கோடியே 25 லட்சத்தில் கட்டிமுடிக்கப்பட்டது. 506 ஏக்கர் பரப்பில், 27 அடி உயரத்தில் இந்த அணை கட்டப்பட்டுள்ளது.
இந்த அணையில் இருக்கும் நீரைக்கொண்டு உத்தமபாளையம், இலக்கமநாயக்கன்பட்டி, முளையாம்பூண்டி, புதுப்பை, கஸ்தூரிபாளையம், நாகமநாயக்கன்பட்டி, மயில்ரங்கம், வேலப்பநாயக்கன்வலசு ஆகிய கிராமங்களில் 6 ஆயிரத்து 43 ஏக்கர் பாசனம் பெறும் வகையில் திட்டமிடப்பட்டது.
கடந்த 1980, 1981, 1982 ஆகிய 3 ஆண்டுகள் மட்டும் பரம்பிகுளம்-ஆழியாறு உபரிநீர் அணைக்கு திறந்து விடப்பட்டது. அதற்கு பின்னர் இது வரையில் தண்ணீர் வரவில்லை. அமராவதி ஆற்றில் இருந்து வரும் நீரை அணைக்கு திறந்து விட நடவடிக்கை எடுக்கக்கோரி பாசன விவசாய நல சங்கத்தின் சார்பில் பலமுறை அரசிடம் கோரிக்கை விடுத்தனர்
இந்த கோரிக்கையை வலியுறுத்தி கடந்த மாதம் திருக்கார்த்திகை தினத்தன்று அரசின் கவனத்தை ஈர்க்கும் வகையில் அப்பகுதி விவசாயிகள் மற்றும் பொதுமக்கள் சேர்ந்து 10 ஆயிரத்து 8 அகல் விளக்குகளை ஏற்றினர்.
அதற்கு பின்னரும் அணைக்கு தண்ணீர் திறக்கப்படவில்லை. இந்த நிலையில் நேற்று உத்தமபாளையத்தில் உள்ள பொதுப்பணித்துறை அலுவலகத்தில் நடந்த குடியரசு தின விழாவில் விவசாயிகளும், பொதுமக்களும் கலந்துகொண்டனர்.
பின்னர் அணைக்கு தண்ணீர் திறந்து விடக்கோரி தேசியக்கொடியை கையில் ஏந்தியவாறு பொதுப்பணித்துறை அலுவலகத்தில் இருந்து வட்டமலைகரை ஓடை அணை வரை பொதுமக்கள் ஊர்வலமாக சென்றனர். இது அந்த பகுதியில் பரபரப்பை ஏற்படுத்தியது. அதன் பின்னர் பல்வேறு தன்னார்வ அமைப்பை சேர்ந்த தொண்டர்கள் அணையை சுத்தம் செய்யும் பணியில் ஈடுபட்டனர். அதனை தொடர்ந்து அணையின் வெளிப்புறத்தில் மரக்கன்றுகளையும் நட்டனர்.
Related Tags :
Next Story
"Daily Thanthi" a prestigious product from The Thanthi Trust
எங்களைப்பற்றி தனித்தன்மை பாதுகாப்பு தொடர்புகொள்ள வலைத்தள தொகுப்பு ஆலோசனைகள் வேலைவாய்ப்பு
Paper Ad Tariff Web Ad Tariff Terms & Conditions (E-paper)
காப்புரிமை 2024, © The Thanthi Trust Powered by Hocalwire
