அக்னி சட்டி தயாரிக்கும் பணி மும்முரம்

ஆண்டுதோறும் மாசி-பங்குனி திருவிழா தொடங்கினாலே பல்வேறு இடங்களில் உள்ள அம்மன் கோவில்களில் திருவிழாக்கள் நடைபெறும். இந்நிலையில் இந்தாண்டு மாசி மாதம் பிறந்ததால் தற்போது பல்வேறு இடங்களில் கோவில் திருவிழாக்கள் தொடங்கி உள்ளன.
. சிவகங்கை மாவட்டத்தை பொறுத்தவரை காரைக்குடி மீனாட்சிபுரம் முத்துமாரியம்மன் கோவில், தாயமங்கலம் முத்துமாரியம்மன் கோவில், திருப்புவனம் மாரியம்மன் கோவில் உள்ளிட்ட பல்வேறு கோவில்களில் விழாக்கள் தொடங்கி உள்ளன. இதில் தற்போது காரைக்குடி மற்றும் திருப்புவனம் பகுதியில் உள்ள கோவில்களில் விழா தொடங்கி நடைபெற்று வருகிறது. தாயமங்கலம் கோவில் திருவிழா விரைவில் தொடங்க உள்ளது.
அக்னி சட்டி தயாரிக்கும் பணி
இந்த நிலையில் காரைக்குடி அருகே கோட்டையூர் பைபாஸ் ரோடு பகுதியில் கோவில் திருவிழாவின் போது பக்தர்கள் நேர்த்திக்கடன் செலுத்த பயன்படுத்தப்படும் மண்ணால் செய்யப்பட்ட அக்னி சட்டிகள், ஆயிரம் கண் பானை, முளைப்பாரி ஓடு உள்ளிட்டவைகள் தயாரிக்கும் பணி மும்முரமாக நடைபெற்று வருகிறது. இந்த பணியில் கோட்டையூரைச் சேர்ந்த பாண்டி என்பவர் ஈடுபட்டு வருகிறார். இதுகுறித்து அவர் கூறியதாவது-
அக்னிசட்டியை பொறுத்தமட்டில் 3,5,7,9,11,13,16ஆகிய முகம் கொண்ட பானைகள் உருவாக்கப்பட்டு அதில் வர்ணம் பூசும் பணி நடைபெற்று வருகிறது. இதேபோல் முளைப்பாரி எடுத்து செல்ல பயன்படுத்தப்படும் முளைப்பாரி ஓடுகள், சிறியது மற்றும் பெரிய அளவில் தயாரிக்கப்பட்டு வர்ணம் பூசப்பட்டு வருகிறது. இந்த பணிகள் தொடங்குவதற்காக கடந்த ஒரு மாதத்திற்கு முன்னதாகவே விரதம் இருக்கிறோம். அதன் பின்னர் தான் இந்த பணிகளை தொடங்குகிறோம்.
இங்கு தயாரிக்கப்படும் இந்த நேர்த்திக்கடன் 3 முகம் கொண்ட பானை ரூ.100-ம், 7முதல் 16 முகம் கொண்ட பானைகள் வரை ரூ.700 முதல் ரூ.800 வரை விற்கப்படுகிறது. இவ்வாறு தயாராகும் பானைகள் காரைக்குடி, தாயமங்கலம், சாக்கோட்டை மற்றும் புதுக்கோட்டை மாவட்டம் திருமயம், கொன்னையூர் ஆகிய பகுதியில் இருந்து பக்தர்கள் வாங்கிச் செல்கின்றனர். இதுதவிர விநாயகர் சதுர்த்தி காலங்களில் இங்கு விநாயகர் சிலைகளும், அய்யனார் கோவில்களுக்கு நேர்த்திக்கடன் செலுத்துவதற்காக மண் குதிரைகளும் தயாரிக்கப்படுகிறது.
 இவ்வாறு அவர் கூறினார்.