சிவராத்திரியையொட்டி சிவன் கோவில்களில் நான்கு கால சிறப்பு பூஜை

முசிறி, 

சிவராத்திரியையொட்டி சிவன் கோவில்களில் நான்கு கால சிறப்பு பூஜை நடைபெற்றது.

திருச்சி மாவட்டத்தில் மகாசிவராத்திரியை முன்னிட்டு பல்வேறு சிவன் கோவில்களில் 4 கால சிறப்பு பூஜைகள் நடைபெற்றன. ஆண்டுதோறும் மாசி மாதம் தேய்பிறை திரயோதசி மற்றும் சதுர்தசி சந்திக்கும் நாள் இரவு மகாசிவராத்திரி விழா கொண்டாடப்பட்டு வருகிறது. 

சிவராத்தியையொட்டி திருவானைக்காவல் ஜம்புகேஸ்வரர் அகிலாண்டேஸ்வரி கோவிலில் 4 கால பூஜைகள் நடைபெற்றது. அப்போது சிறப்பு அபிஷேகம் மற்றும் பஞ்சோபசார தீபங்கள் காட்டி பூஜைகள் நடைபெற்றது. கோவில் கொடிமர மண்டபம் மற்றும் கண்ணுக்குட்டி மண்டபத்தில் நூற்றுக்கணக்கான சிவனடியார்கள் நான்கு சாமங்களிலும் சிவபூஜை நடத்தினர்.

இதில் விரும்புவோருக்கு சிவதீட்சையளிக்கும் நிகழ்ச்சியும் நடைபெற்றது. கோவில் வளாகத்தில் உள்ள நவராத்திரி கலை விழா மண்டபத்தில் இரவு முழுவதும் நாட்டியாஞ்சலி நிகழ்ச்சி நடைபெற்றது.

திருச்சி மலைக்கோட்டை தாயுமான சுவாமி கோவிலில் நேற்று முன் தினம் காலை 8 மணிக்கு மேல் லட்சார்ச்சனை நிகழ்ச்சி நடைபெற்றது. அதையடுத்து சிவராத்திரியான நேற்று இரவு 4 கால பூஜைகள் நடைபெற்றது. 

முன்னதாக ஒவ்வொரு கால பூஜைக்கும் பல்வேறு அபிஷேகங்கள் முடிந்து சிவனுக்கு சிறப்பு அலங்காரம் செய்யப்பட்டு தீபாராதனை நடைபெற்றது. பின்னர் சிவராத்திரியை விளக்கும் வகையில் வேடன் ஐதீக நிகழ்ச்சி நடைபெற்றது.இதுபோல் உறையூர் பஞ்சவர்ணசுவாமி கோவிலில் 4 கால சிறப்பு பூஜைகள் நடைபெற்றன.

முசிறி சந்திரமவுலீஸ்வரர் சமேத கற்பூரவள்ளி அம்மன், வெள்ளூர் கிராமத்தில் திருக்காமேஸ்வரர் சமேத சிவகாமசுந்தரி அம்மன், திண்ணகோணம் பசுபதீஸ்வரர், திருத்தலையூர் சப்தரிஷீஸ்வரர், தா.பேட்டை காசி விஸ்வநாதர் சமேத காசிவிசாலாட்சி அம்மன், காருகுடி கிராமத்தில் ரேவதி நட்சத்திர தலமாக விளங்கும் கைலாசநாதர் சமேத கருணாகரவள்ளி அம்மன், கல்லக்குடியில் உள்ள நித்ய கல்யாணி உடனுறை பசுபதீஸ்வரர், புள்ளம்பாடியில் உள்ள சிதம்பரேஸ்வரர், நல்லியம் பாளையத்தில் கைலாசநாதர் கோவில், குழுமணியில் அமைந்துள்ள நாதசுவாமி உடனுறை லோகநாயகிம்மன் கோவில், விஸ்வாம்பாள் சமுத்திரத்தில் காசிவிஸ்வநாதர் கோவில், கொப்பம்பட்டி சப்தரிஷீஸ்வரர்  உள்ளிட்ட பல்வேறு சிவாலயங்களில் மகா சிவராத்திரியை முன்னிட்டு நான்கு காலபூஜைகள் நடந்தது. 

இதுபோல் உப்பிலியபுரத்தை அடுத்துள்ள வைரிசெட்டிப்பளையம் அன்னகாமாட்சியம்மன், தொட்டியம் அங்காளபரமேஸ்வரி கோவில், சமயபுரம் மாரியம்மன் கோவில் முன்பு உள்ள அங்காளபரமேஸ்வரி அம்மன் கோவில் ஆகியவற்றில் மகா சிவராத்திரியை முன்னிட்டுகோவிலிலும் சிறப்பு பூஜைகள் நடைபெற்றன. இதில் திரளான பக்தர்கள் கலந்து கொண்டு இரவு முழுவதும் கண் விழித்திருந்து வழிபாடு மேற்கொண்டனர். மேலும் கலைநிகழ்ச்சிகளும் நடந்தது.