துணை ராணுவத்தினர் தீவிர வாகன சோதனை

தமிழகத்தில் அடுத்த மாதம்(ஏப்ரல்)6-ந்தேதி சட்டசபை தேர்தல் ஒரே கட்டமாக நடைபெற உள்ளது. இதையொட்டி தற்போது தேர்தல் விழா களை கட்டி உள்ளது. பல்வேறு கட்சியில் வேட்பாளர்கள் அறிமுகப்படுத்தி வேட்பு மனு தாக்கல் செய்யும் நிகழ்ச்சியும் நடைபெற்று வருகிறது. இந்த நிலையில் தற்போது வாக்காளர்களுக்கு பணம் கொடுப்பதை தடுத்தல் மற்றும் அன்பளிப்பு உள்ளிட்ட பொருட்கள் கொண்டு செல்வதை தடுக்கும் பணியில் தேர்தல் பறக்கும் படையினர் போலீசாருடன் இணைந்து தீவிரமாக கண்காணிப்பில் ஈடுபட்டு வருகின்றனர்.
இந்த நிலையில் சட்டமன்ற தேர்தல் பணிக்காக பீகார், உத்தரகாண்ட், உத்தரபிரதேசம், அசாம் உள்ளிட்ட பல்வேறு மாநிலங்களில் இருந்து சிவகங்கை மாவட்டத்திற்கு ஏராளமான துணை ராணுவ படை வீரர்கள் துப்பாக்கி ஏந்திய நிலையில் பாதுகாப்பு பணிக்காக வந்துள்ளனர். இவர்கள் அந்தந்த பகுதியில் சோதனையில் ஈடுபட்டு வரும் போலீசாருடன் இணைந்து இரவு, பகலாக வாகன சோதனையில் ஈடுபட்டு வருகின்றனர்.
சிவகங்கை-திருப்பத்தூர் பைபாஸ் சாலை, மானாமதுரை-பரமக்குடி சாலை, திருப்புவனம்-பூவந்தி சாலை, திருப்பத்தூர்-சிவகங்கை பைபாஸ் சாலை, காரைக்குடி அருகே கோவிலூர் வாகன சோதனைச்சாவடி  உள்ளிட்ட ஏராளமான பகுதியில் துப்பாக்கி ஏந்தியபடி துணை ராணுவ வீரர்கள் வாகன சோதனையில் ஈடுபட்டு வருகின்றனர். ஏற்கனவே 4 சட்ட மன்ற தொகுதிக்குட்பட்ட பகுதியில் துணை ராணுவ வீரர்கள் போலீசாருடன் இணைந்து கொடி அணிவகுப்பில் ஈடுபட்டனர். தற்போது போலீசாருடன் இணைந்து துணைராணுவத்தினர் வாகன சோதனையில் ஈடுபட்டு வருகின்றனர். வாகனங்களில் பணம், பரிசு பொருட்கள் கடத்தி கொண்டு செல்லப்படுகிறதா? என கண்காணிக்கப்படுகிறது.