வீட்டின் கதவை உடைத்து 4 பவுன் நகை திருட்டு

குளித்தலை
குளித்தலை அண்ணாநகர் புறவழிச்சாலை பகுதியை சேர்ந்தவர் லோகாம்பாள் (வயது 77). இவர் நேற்று முன்தினம் தனது வீட்டில் உள்ள ஒரு அறையில் தூங்கிக் கொண்டிருந்தார். மற்றொரு அறையில் அவரது மகள், மருமகன் தூங்கிக் கொண்டிருந்தனர். அப்போது வீட்டின் கதவை உடைத்து மர்ம நபர் ஒருவர் உள்ளே புகுந்தார். நள்ளிரவில் மூதாட்டி இருந்த அறையில் சாவி விழும் சத்தம் கேட்டுள்ளது. இதனால், அவர் திடுக்கிட்டு எழுந்து பார்த்தபோது அடையாளம் தெரியாத மர்ம நபர் ஒருவர் வீட்டுக்குள் இருந்து வெளியேறி வீட்டின் முன் பக்கம் இருந்த இரும்பு கதவை தாண்டி குதித்து ஓடினார். பின்பு அந்த மூதாட்டி வீட்டில் தூங்கிக்கொண்டிருந்த தனது மகள் மற்றும் மருமகனை எழுப்பி கூறினார். பின்னர் அனைவரும் அந்த மர்ம நபரை தேடியபோது அவரை கண்டுபிடிக்க இயலவில்லை. பின்னர், வீட்டிற்குள் சென்று பார்த்தபோது மூதாட்டியின் அறையில் உள்ள பீரோ லாக்கரில் வைக்கப்பட்டிருந்த தங்க சங்கிலி, தோடு, மோதிரம் என 4 பவுன் நகைகள் மற்றும் ரொக்கப்பணத்தை மர்ம நபர் திருடிச் சென்றிருந்தது தெரிய வந்தது. இதுகுறித்து குளித்தலை போலீசாருக்கு லோகாம்பாள் தகவல் தெரிவித்தார். அதன்பேரில் அங்கு வந்த போலீசார் விசாரணை நடத்தினர். மேலும் கைரேகை நிபுணர்களும் மர்ம நபரின் ரேகைகளை பதிவு செய்தனர். இந்த திருட்டு சம்பவத்தில் ஈடுபட்ட மர்ம நபரை போலீசார் வலைவீசி தேடி வருகின்றனர். இந்த திருட்டு சம்பவம் அப்பகுதியில் பரபரப்பை ஏற்படுத்தியுள்ளது.